Мугудай нэһилиэгэр быйыл олохтоохтор түмсүүлээх үлэлэринэн тутуллубут саха балаҕаныгар үгүс тэрээһин тиһигин быспакка ыытыллар. Бу күннэргэ манна норуот маастардара Александра Оконешникова, Сардаана Скрябина хаппахтаах туос иһит оҥоруутугар маастар кылаас ыыта сылдьаллар. Арассыыйа, өрөспүүбүлүкэ, улуус таһымнаах араас күөн күрэс кыайыылааҕын , СӨ маастар-педагогун Александра Фоминичнаны өрөспүүбүлүкэҕэ туоһунан сахалыы уус-уран оҥоһугу сэҥээрээччилэр, таптааччылар бука бары билэллэрэ саарбаҕа суох, оттон Сардаана Егоровна оскуолаҕа үөрэнэ сылдьыаҕыттан киниэхэ уһуйуллан тахсыбыт норуот маастара буолар.
Александра Фоминична 1992 сылтан Мугудайдааҕы оскуолаҕа «Туосчаана» куруһуогу салайыаҕыттан үгүс оҕону, эдэр дьону туос умсулҕаннаах эйгэтигэр сыһыаран, үөрэтэн таһаардаҕа. «Ийэм туоһунан дьарыктанар этэ, онон кыра эрдэхпиттэн ону көрөн, ийэбэр көмөлөһөн улааппыт буоламмын олус интэриэһиргиир этим. Дьиктитэ баар — бииргэ төрөөбүт эдьиийим да, балтым да бу дьарыкка умсугуйан ылларбатахтара. Мин, баҕар, инники идэм туос оҥоһугу кытта ситимнээх буоларын курдат таайан, оҕо сааспыттан бу дьарыкка ис сүрэхтэн ылларбытым буолуо»,-диэн кини санаатын үллэстэр. Онон Александра Фоминична үөрэнээччитин Сардаана Егоровнаны кытары былырыыҥҥыттан баҕалаах дьону мунньан туоһунан тигии кистэлэҥнэрин үллэстэллэр. Билигин манна Төлөй, Чурапчы, Чыаппара, Хатылы нэһилиэктэриттэн кэрэ аҥардар кэлэн үөрэнэ сылдьаллар, уопут атастаһаллар.
Маастар кылаас туһунан сиһилии видеоҕа көрүҥ.
Наталья Сибирякова, ааптар видеота, хаартыската