Биһиги Чурапчыбыт улууһугар дьахталлар түмсүүлэрин үлэлэрэ дьоҥҥо-сэргэҕэ киэҥник биллэр. Ол курдук, Мугудайдааҕы «Сайдыына» дьахталлар сүбэлэрэ 2019 сыллаахтан тэриллэн үлэлии сылдьар. Сүбэ тэриллиэҕиттэн ыла бэрэссэдээтэлинэн Захарова Екатерина Егоровна ситиһиилээхтик салайан кэллэ. Кинини кытта сүбэ үлэтин-хамнаһын сиһилии кэпсэттим.
«Сайдыына» сүбэбит 13 чилиэннээх. Биһиги сүбэбит нэһилиэк, улуус култуурунай уонна общественнай олоҕор сылын ахсын көхтөөхтүк кыттан кэллэ. Үлэбит сүрүн хайысхаларынан манныктары ааттыахха сөп:
- Национальнай култуураны үйэтитии: урукку кэмҥэ иистэнэн ааспыт уран тарбахтаахтар ааттарын үйэтитэр сыаллаах иискэ сыһыаннаах тэрээһиннэри ыытыы. Бу күрэхтэргэ дьахталларбыт талааннарын толору арыйан, сахалыы иистэнэр үгэстэри кэлэр көлүөнэҕэ тиэрдии.
- Общественнай үлэ: Нэһилиэкпитигэр ыытыллар араас акцияларга, тэрээһиннэргэ мэлдьи көхтөөхтүк кыттыы.
- Үөрэҕи уонна талааны өйөөһүн: Сылын аайы меценаттары кытта бииргэ үлэлэһэн, «Үрдэл» диэн анал бириэмийэни үөрэхтэригэр, общественнай олоххо уонна ураты ситиһиилэрдээх үөрэнээччилэргэ туттарыы.
- Саргылаах сатабыл сайдыыта: Дьахталлар араас көрүҥнээх уус-уран уонна дьиэ кэргэҥҥэ туһалаах сатабылларын сайыннарарга анаммыт маастар-кылаастары тэрийии. «Сайдыына» дьахтар сүбэтин чилиэнэ Варламова Мария Илларионовна көҕүлээһининэн Грантовай проект суруйуутун саҕалааһын.
Биһиги улахан ситиһиибитинэн буолар:
2023 сыл «Сайдыына» дьахталлар сүбэлэрин үлэтигэр ураты бэлиэ сылынан буолар. Биһиги «Сайдыына» сүбэбит Саха Өрөспүүбүлүкэтин Ил Дархана А.С. Николаев волонтерскай аналлаах бырайыактары өйүүр грант-куонкуруһугар кыттан, «Талисман победы» проект кыайыыны ситиспитэ. Бу сүдү ситиһии сүбэ үлэтин саҥа, үрдүк таһымҥа таһаарбыта. Ылбыт грант үбүнэн тигии үлэтин кэҥэтэр уонна хаачыстыбатын тупсарар саҥа тэриллэр – тигии массыыналар, ону таһынан иистэнэр матырыйааллар (фурнитура) атыыласпыппыт.
Грант ылыллыбытын кэннэ «Сайдыына» дьахталлар сүбэлэрин үлэтэ өссө кэҥээн, улууспут олоҕор араас бырайыактары олоххо киллэрдэ:
- Баай уопуттаах иистэнньэҥ Сивцева Аксинья Алексеевна салалтатынан маастар-кылаастар, семинардар, күрэхтэр өссө элбээбиттэрэ.
- Нэһилиэкпитин ыраас, кэрэ оҥорорго анаммыт субуотунньуктар көхтөөхтүк ыытыллаллар.
- Саамай бэлиэ үлэнэн, Анал байыаннай дьайыыга (СВО-ҕа) кытта сылдьар биир дойдулаахтарбытыгар анаан сылаас таҥаһы-сабы уонна да атын туһалаах малы-салы – сүрдээх элбэҕи тигэн, ону таһынан, күһүн-саас дойдуларын ахтылҕаннаах булт аһын астаан ыытар. Бу үлэбитинэн биһиги улууспут дьахталлара дойдуларыгар бэриниилээхтэрин өссө төгүл дакаастаабыта.
- 2023 сыл түмүгүнэн биһиги түмсүүбүт «Бастыҥ общественнай проект» анал аат кыайыылааҕа буолбута.
- Өссө биир киэн туттар ситиһиибитинэн, биһиги «Сайдыына» икки чилиэнэ Сивцева Аксинья Алексеевна уонна бэйэм улуустааҕы Ахматова Надежда Прокопьевна салайааччылаах «Сатабыл» хамаандаҕа киирэн, «Илии сылааһа» диэн өрөспүүбүлүкэтээҕи улахан күрэҕэр ситиһиилээхтик кыттабыт.
Маннык “Сайдыына” курдук кыһамньылаах, иллээх-эйэлээх дьахтар түмсүүтэ нэһилиэк уонна улуус олоҕун тупсарыыга, уопсастыба сайдыытыгар улахан суолталаах. Кинилэр бэйэлэрин холобурдарынан үтүө дьыала туһугар биир дойдулаахтарбыт сомоҕолоһоллоругар уонна патриотическай тыын үрдүүрүгэр төһүү күүс буолаллар. Илии уонна дууһа сылааһын ууран туран оҥоһуллубут үлэ кэнэҕискитин да нэһилиэк, улуус сайдарыгар улахан кылаат буола туруоҕа диэн эрэнэбит.
Лилия Попова