Бүгүн ахсынньы 8 күнүгэр Д.Д.Красильников аатынан Мугудай орто оскуолатыгар «Цифровой үөрэх эйгэтин» кабинетын арыйыы үөрүүлээх быһыыга-майгыга ыытылынна.
Бүгүҥҥү үөрүүлээх тэрээһиҥҥэ Үөрэхтээһин уонна наука миниистирэ Соколова Ньургууна Афанасьевна видео эҕэрдэтин иһиттибит. Олохтоох дьаһалта аатыттан баһылык солбуйааччыта Илья Дмитриевич Сивцев, оскуолабыт директора Николай Кузьмич Пермяков, улуус баһылыгын социальнай боппуруостарга солбуйааччы Мария Филипповна Кронникова, Үөрэх управлениятын начальнигын бастакы солбуйааччы Афанасий Петрович Максимов эҕэрдэлэрин эттилэр. Ыалдьыттар аныгы олох тэтимин кытта тэҥҥэ хардыылыырга сөптөөх эйгэ тэриллибитэ бары өттүнэн туһалаах буоларын туһунан тоһоҕолоотулар. «Цифровой үөрэх эйгэтин» кабинета арыллыытын лиэнтэтин быһар чиэс Николай Кузьмич Пермяковка, Мария Филипповна Кронниковаҕа, Афанасий Петрович Максимовка, 8 кылаас үөрэнээччитэ экономика олимпиадатын кыайыылааҕа Эрхан Сидоровка тигистэ.
Аҕыйах күнүнэн биһиги нэһилиэкпитигэр түргэн интернет ситимэ киирдэҕинэ цифровой үөрэх эйгэтэ кэҥиирэ бары өттүнэн биһиэхэ туһалаах буолара эрэбил. Ирдэбилгэ эппиэттиир контент баазата киэҥ. Маны учуутал уруогар, дьарыгар туһаныан сөп. Онтон оҕолор аныгы технологияны туһанан бэйэлэрэ толкуйдаан, аттаран үгүһү оҥорон таһаарыахпытын сөп.
Кэбиниэт үөрэх хаачыстыбата үрдээн, кыаҕа кэҥээн, биһиги элбэххэ үөрэнэрбитигэр төһүү күүс буолара саарбаҕа суох. Инникитин «Цифровой үөрэх эйгэтин» туттан, баһылаан үөрэхпитигэр, үлэбитигэр туһаныахпыт, билиибитигэр элбэх саҥаны, туһалааҕы киллэриэхпит диэн эрэнэбит.
“Маралаайы кэскилэ” медиа киин. Күннэй Смирникова 10 кылаас
Видео Наталья Сибирякова