Сахабыт сирэ олус киэҥ сиринэн тэнийэн сытар ураты өрөспүүбүлүкэ. Киһи ылла да талбыт оройуонугар судургутук тиийбэт. Онон атын улуус сирин-уотун, олоҕун-дьаһаҕын, дьонун-сэргэтин көрө-истэ барар кыах үөскээтэҕинэ, төһө кыалларынан туһанар ордук бөҕө буоллаҕа. Ааспыт өрөбүллэргэ сиртэн хостонор күндү тааһынан бүтүн Аан дойдуга аатырбыт Мииринэй куоракка «Притяжение Мирного» улахан бэстибээл ыытылынна. Манна өрөспүүбүлүкэ араас улуустарыттан, Дьокуускайтан суруналыыстар, блогердар ыҥырыллан баран ыалдьыттаан кэллибит. Бэлиэтээн эттэххэ, эрдэ бу бэстибээл «Притяжение АЛРОСА» диэн ааттанан хампаанньа үлэһиттэригэр ананар эбит буоллаҕына, быйыл бастакытын маннык киэҥ хабааннаахтык тэрилиннэ.
Бүгүҥҥү Мииринэй хайдах олорорун илэ харахпытынан көрөн, олохтоохтору кытары ирэ-хоро кэпсэтэн, икки күн устата бэстибээл чэрчитинэн ыытыллар тэрээһиннэргэ сылдьан үгүһү биллибит-көрдүбүт. Бастакы күн сарсыардаттан «Алмазная долина» кыһыҥҥы спорт көрүҥнэрин базатыгар хайыһарга, сноубордка өрөспүүбүлүкэтээҕи күрэх үөрүүлээх аһыллыытыгар сырыттыбыт. Бары ирдэбилгэ эппиэттиир тупсаҕай оҥоһуулаах база территориятыгар актыыбынай сынньалаҥҥа туһуламмыт усулуобуйа толору көрүллүбүт. Күрэхтэһиигэ 70-тан тахса спортсмен 1 600 000 солк. пуондалаах бириис иһин илин-кэлин түһүстүлэр.
Манна күрэхтэһиини таһынан АЛРОСА хампаанньа салалтата суруналыыстар дэлэгээссийэлэрин кытары брифинг тэрийдэ. «Дьон-сэргэ Мииринэй куораты бырамыысыланнас уонна сир баайын хостуур киин эрэ быһыытынан ылыналлар. Ол иһин араас атын эйгэҕэ эмиэ сайдыы барарын, нэһилиэнньэ олоҕун-дьаһаҕын, култуура, спорт таһымын көрдөрөр-иһитиннэрэр сыалтан бу бэстибээл тэрилиннэ. Холобур, биһиги куораппыт оҕону бары өттүнэн сайдыылаах киһи гына иитэн-үөрэтэн таһаарарга уһулуччу үчүгэй куорат дии саныыбыт. Манна уһуйааннарга уочарат суох, хас биирдии оҕо балтараа сааһыттан миэстэнэн хааччыллар. Оҕо үөрэнэр, дьарыктанар тэрилтэтэ барыта чугас-чугас турар буолан сатыы сылдьаллар. Спорт көрүҥнэригэр, ырыаҕа, үҥкүүгэ, уруһуйга уо.д.а. араас хайысхалаах куруһуоктар биир ыйга баара-суоҕа 100 солк. төлөбүрдээхтэр. Хамнас кээмэйэ үрдүк»,-диэн Мииринэй куорат мэра Алексей Тонких билиһиннэрэр. АЛРОСА хампаанньа генеральнай дириэктэрэ Павел Маринычев: «Мииринэй нэһилиэнньэтэ, биһиги хампаанньабыт үлэһиттэрэ төһө кыалларынан бары өттүнэн үчүгэй усулуобуйанан хааччыллан, кыһарыйтарыы кыһалҕатын билбэккэ интэриэһинэй, дьоллоох олоҕу олороллоругар баҕарабыт. Кинилэр манна олохсуйа хаалар баҕа санааланалларын ситиһэ сатыыбыт. Бу бэстибээл биир сүрүн сыала диэн биһиги манна үлэлиирбитин таһынан күннэтэ олохпут күөстүү оргуйарын, сайдыы барарын көрдөрүү буолар. Манна үлэлиирдии эрэ буолбакка, букатын олохсуйа көһөн кэлэр дьоҥҥо үөрэбит, кинилэргэ бары өттүнэн өйөбүл баар буоларын санатабыт»,-диир.
Чахчы даҕаны, АЛРОСА ыытар социальнай бэлиитикэтигэр сыллата үгүс миллиардынан сууманы барыыр. Ол эбэтэр, үлэһиттэр доруобуйаларын тупсарыыга, үлэһит дьиэ кэргэнин кытары сынньана, эмтэнэ барарыгар, култуура уонна спорт сайдыытыгар, олорор дьиэнэн хааччыйыыга уо.д.а. атын хайысхаларынан хампаанньа үлэһиттэрин өйүүр. Ол туһунан брифинг кэмигэр АЛРОСА, Мииринэй оройуонун дьаһалтатын үлэһиттэрэ сиһилии билиһиннэрдилэр.
Былаан быһыытынан, салгыы «Живые алмазы Якутии» аатырбыт айылҕа пааркатыгар сырыттыбыт. Манна баар бизоннары, яктары, аатырбыт як оҕотун Мираны, табалары көрдүбүт. Кинилэр бары килиэккэҕэ хаайыллыбакка киэҥ-куоҥ күрүө иһигэр көҥүллүк сылдьаллар. Биир интэриэһинэй көстүүнэн павлиннар буоллулар, бэл альбинос-павлин кытары баар буолан биэрдэ. Хайдах маннык тыйыс усулуобуйалаах айылаҕаҕа тыыннаах ордон, өссө төрүөх биэрбиттэрэ сөхтөрдө. Маны таһынан, биһиги Мииринэйгэ айаннаан тиийбит күммүтүгэр өссө биир як оҕото, Мира балта, күн сирин көрбүтүн үөрэ-көтө кэпсээтилэр, кырачааны көрдөрдүлэр.
Киэһэ култуура киинигэр «Калейдоскоп талантов» кэнсиэргэ сырыттыбыт. Манна оройуон нэһилиэктэриттэн, куораттан ырыа, үҥкүү кэлэктииптэрэ кытыннылар. Бииртэн биир чаҕылхай нүөмэри көрөн астынныбыт.
Салгыы «Вкусный Мирный» диэн гастрономическай киэһээҥҥи аһылык буолла. Биллэрин курдук, Сахабыт сиригэр араас омук бииргэ алтыһан иллээхтик-эйэлээхтик олоробут. Мииринэйгэ эмиэ үгүс норуот баар. Ол курдук, бу киэһэ бурятскай, татаро-башкирскай, армянскай, азербайджанскай, нуучча уонна саха омук национальнай бүлүүдэлэрин боуробалаатыбыт, ырыаларын-үҥкүүлэрин көрдүбүт. Норуоттар ассамблеялара барыларын түмэн, куорат олохтоохторун ыҥыран норуоттар национальнай бырааһынньыктарын хайаан да бэлиэтииллэрин билиһиннэрдилэр.
Бэстибээл иккис күнүгэр куорат устун экскурсияҕа сырыттыбыт. Куорат устуоруйатын билистибит. Быйыл Мииринэй куорат төрүттэммит үбүлүөйдээх сылын бэлиэтиир. 1955 сыллаахха геологтар манна аан бастаан алмаас баарын булан: «Закурили трубку мира. Табак отличный!» диэн шифровкаламмыт биллэрии ыытыахтарыттан үөскээбит куорат саамай биллэр-көстөр сиригэр — «Мир» карьерга сырыттыбыт. Аан бастаан балаакка дьиэлэргэ олорон тутуллубут Мииринэй бүгүн — олус ыраас, дьоҕус уулуссалардаах, мэндиэмэннээх таас дьиэлэрдээх, сайын күп-күөҕүнэн чэлгийэр тупсаҕай куорат. Бэлиэтээн эттэххэ, куоракка баар үүнээйилэри, мастары (үксэ хатыҥ) бүтүннүү олохтоохтор бэйэлэрин илиилэринэн олордубуттар. Онон сайын Мииринэй хатыҥ солко күөҕүгэр сууланар.
Олохтоохтор даҕаны, чугас сытар Бүлүү бөлөх улуустара даҕаны билиҥҥи кэмҥэ Мииринэйгэ тутулла турар саҥа аэропорт аһылларын туохтааҕар да күүтэллэр. Биһиги дэлэгээссийэ куораттан 4 км сиргэ тутуу эбийиэгэр бара сырыттыбыт. Бэлиэтээн эттэххэ, Мииринэйтэн Дьокуускайга эрэ буолбакка Арассыыйа араас куораттарыгар көтүөххэ сөп. Бүгүҥҥү күҥҥэ үлэ улахан аҥара түмүктэммит, 2,86 км самолет көтөн тахсар былаһаакката оҥоһуллуохтаах. Аэропорт олоххо киирдэҕинэ биир чаас иһигэр 300 пассажиры аһардар кыахтанар. Бу — билигин үлэлии турар аэропортааҕар икки төгүл улахан. «Мииринэйтэн саҥа аэропортка айаннаан кэлэргэ 5,8 килэмиэтирдээх саҥа суол оҥоһулунна. Керамогранит ууруутугар, инженернэй систиэмэ уонна анал оборудование туруоруутугар үлэ бара турар. Быйыл пассажирдары регистрациялыыр уонна багаж ылар-биэрэр систиэмэ оҥоһуллуохтаах. Бизнес-саала уонна көтөр ааллары өрөмүөннүүр ангар эмиэ баар буолаллар»,-диэн «Мииринэй» аэропорт дириэктэрин солбуйааччыта Сергей Дёгтев кылгастык билиһиннэрдэ.
Күн иккис аҥарыгар «Притяжение Мирного» бэстибээл биир умнуллубат түгэнинэн «Чернышевская FORель»балык миинин бырааһынньыга буолла. Олохтоохтор, ыалдьыттар киин болуоссакка мустан Чернышевскайдааҕы рыбоводнай собуот форель балыгыттан оҥоһуллубут минньигэс миини боруобалаатыбыт. Бэстибээлгэ анаан Арассыыйа шеф-повардарын ассоциациятын чилиэнэ, «АЛРОСА-торг» бренд шефа Андрей Никишин салайааччылаах «Зарница» ресторан бастыҥ повардара 250 лиитэрэ балык миинин буһарбыттар. Бу норуот күүлэйэ ырыанан, үҥкүүнэн, оонньуунан доҕуһуолланна.
Десаммыт түмүктүүр туочуката — АЛРОСА хампаанньа «Горняк» медицинскэй киинэ (салайааччы Елена Борисова). Манна урукку өттүгэр хампаанньа үлэһиттэрэ эрэ доруобуйаларын көрүнэр эбит буоллахтарына, билигин Мииринэй олохтоохторо бары эмтэниэхтэрин сөп. Киин үлэһиттэрэ дэлэгээссийэбит хас биирдии киһитигэр «Доруобуйа маршрута» оҥорон эмтэнии ханнык көрүҥүн талбыппытынан ыйан-кэрдэн көрдүлэр-иһиттилэр. Холобур, илии-атах ванната, лимфодренаж, массаж араас көрүҥэ, организм дэписсииттэригэр анаалыс туттарыы, систиэмэнэн битэмиин ылыы, мануальнай терапевт сүбэтэ-амата уо.д.а. көрүҥнэр бааллар. Олохтоохторго маннык доруобуйаларын тупсарыыга анаммыт өҥөлөр сыаналара олус удамыр эбит. Ол курдук, икки нэдиэлэ биир талбыт бырагырааманан эмтэнэргэ саамай ыараабыта 7 тыһ. солкуобайтан тахсаны төлүүллэр, чэпчэтии эмиэ көрүллүөн сөп.
Бу курдук АЛРОСА бэйэтин үлэһиттэрин, Мииринэй нэһилиэнньэтин олохторун таһыма үрдүк буоларыгар, дьон олохтон дуоһуйалларыгар бары өттүнэн усулуобуйаны тэрийэргэ кыһаллар. Кырдьыга даҕаны, икки-үс күн бу куоракка сылдьан, дьону кытта кэпсэтэн да иһиттэххэ, бука бары үчүгэйи эрэ кэпсииллэрэ кэрэхсэбиллээх. Бэл, уулусса устун хаама сылдьан биир да ыксаабыт, ыгылыйбыт, кыыһырбыт сирэйдээх киһини да көрбөтүбүт. Аҥардас киин болуоссаттара биир да төрөппүт манабыла суох киэһэ хойукка диэри оҕо аймах дьоллоох күлүүтүнэн туолара ураты көстүү буолла.
Наталья Сибирякова, ааптар видеолара