— диэн Хоптоҕо нэһилиэгин олохтооҕо, өр сыл учууталынан үлэлээбит билигин бочуоттаах сынньалаҥҥ олорор Варвара Пестерева ыйытар.
“Бэйэм ыарытыйар буоламмын, эмтэнэр сыалтан ону-маны барытын хасыһан үөрэтэбин, көрө-истэ сатыыбын. Онуоха уҥуохтара ыалдьар дьон тэтиҥ маһынан эмтэнэллэрин туһунан булан аахпытым. Былырыын кэргэммэр адарай оҥоттороору тэтиҥ маһын быһан аҕалбыппыт. Ол онтон хаалбыт быстаҕас таһырдьа ордон хаалбыта, кыстаатаҕа дии. Онтон бу сарсыарда өйдөөн көрбүтүм, дьиэбит иннигэр, күн саамай көрөр сиригэр олбуорбутугар өйөнөн турбут умнас сэбирдэхтэммит. Маҥнай утаа “туох эрэ от сыстыбыт” диэммин ылҕаары гыммытын, лабаата буолан таҕыста, соһуйдубут аҕай. Олоххо тардыһыы диэн дьэ күүстээх да буолар эбит!
Дьиҥэр миэтэрэ курдук уһун этэ, ону ити быһан ылан салгыы үүнэн барыа диэн санааттан буорга астым. Тэтиҥ мас уопсайынан олус туһалаах эбит ону бэйэбитигэр боруобалаан көрөммүт биллибит. Холобура, сэбирдэҕин оргутан испиппит үс сыл буолла, ис уорган кирин-хаҕын бүтүннүү суурайар диэн суруйбуттар этэ, чахчы оннук эбит! Бу саас кэргэммин кытары куоракка киирэн “Фэмили Клиник” сылдьан көрдөрүммүппүт, ол онно “оһоҕоскут ып-ыраас, тугу даҕаны булбатыбыт” диэн бигэргэппиттэрэ. Билигин ол адарайы оҥотторон дьыбааммар уурунан сиспин эмтээри сытабын, туһалыыр”, — диэн Варвара Егоровна күлэ-үөрэ төлөпүөн нөҥүө кэпсээтэ.
Дьэ онон тэтиҥ — чахчы даҕаны эмтээх мас. Манна даҕатан эттэххэ, сэбирдэҕин, субатын састаабыгар эфирнэй арыы, аскорбиновай аһыыба, протеин, каротин, араас микроэлеменнэр элбэхтэр эбит. Бу мастан бэл диэтэр бастакы аспирины уонна антибиотигы оҥорбуттара биллэр.
Кэпсэттэ Сэмэн ЖЕНДРИНСКЭЙ