От ыйын 7-12 күннэригэр Саха сирин олохтоохторун болҕомтотун 22-с “Манчаары оонньуулара” тарта. Оонньууга уопсайа холбоон 47 хамаандаҕа 1661 спортсмен уонна 300 судьуйа кыттыыны ылла. Биһиги улууспутуттан 111 спортсмен барыта 11 көрүҥҥэ күрэхтэстилэр. Эриирдээх-мускуурдаах киирсиилэргэ бары да спортсменнарбытыгар сүрэхпитинэн ыалдьан, кинилэри кытта тэҥҥэ кыайыы өрөгөйүн, хотторуу хомолтотун биллибит. Спартакиада түмүгүнэн Чурапчы улууһун спортсменнара барыта 16 кыһыл көмүс, 19 үрүҥ көмүс, 19 боруонса мэтээли кэттилэр. Уопсай түмүккэ бэйэбит бөлөхпүтүгэр Чурапчы улууһун хамаандата 1-кы миэстэ буолары ситистилэр!
Бүгүн “Айылгы” НАДь кыайыылаахтары өрөгөйдүүр дьоро күн тэрилиннэ. Улуус баһылыга Степан Саргыдаев, дьокутааттар Сэбиэттэрин бэрэссэдээтэлэ Яков Оконешников спортсменнары эҕэрдэлээтилэр, наҕараадалары туттардылар. Кыһыл көмүс мэтээллээхтэргэ убаһа уонна 30 тыһ солк сэртипикээттэр, үрүҥ көмүс мэтээллээхтэргэ 70 тыһ солк сэртипикээттэр, боруонса мэтээллээхтэргэ 50 тыһ солк сэртипикээттэр туттарылыннылар.
Дакылааты улуустааҕы спорт салалтатын начаалынньыга Дьулустан Егоров оҥордо. Кини Таатта дьонугар-сэргэтигэр, түспүт уһуйааннарыгар, туох баар күүс-көмө буолбут дьоҥҥо барыларыгар махтал тылын эттэ.
“Оройуонун иннигэр үтүөлэрин иһин” 3-с степеннээх бэлиэнэн хапсаҕайдьыттар Айаал Павлов, Никита Софронов, Иван Друзьянов, мас тардыһыы тириэньэрэ Егор Капитонов, улуустааҕы спорт салалтатын начаалынньыга Дьулустан Егоров наҕараадаланнылар.
Түөскэ анньыллар үрүҥ көмүс бэлиэлээх Чурапчы улууһун бочуотунай грамотатын хапсаҕай тириэньэрэ Альберт Макаров, буулдьанан ытыы тириэньэрэ Николай Смирников, чэпчэки атлетика тириэньэрэ Алексей Кардашевскай, хотугу многоборье тириэньэрэ Альберт Иванов, спорт салалтатын инструктора Альберт Собакин туттулар.
Улуус баһылыгын махталын ДЮСШ хапсаҕайга тириэньэрэ Иван Ким, мас тардыһыы федерациятын бэрэссэдээтэлэ Михаил Игнатьев, буулдьанан ытыы тириэньэрэ Прокопий Пермяков, ДЮСШ буулдьанан ытыыга тириэньэрэ Валерий Яковлев, чэпчэки атлетика федерациятын бэрэссэдээтэлэ Юрий Слепцов, төрүт оҕунан ытыы тириэньэрэ Дария Фомина, о.д.а. ыллылар.
Бүгүн биһиги махтанабыт кыайыыны аҕалбыт дьоммутугар – спортсменнарга уонна кинилэр тириэньэрдэригэр! Чурапчы – спорт туоната!
Елена Макаринская