Бүгүн о.э атырдьах ыйын 17 күнүгэр Мэҥэ Хаҥалас улууһун Майа сэлиэнньэтигэр Аан дойду кылаастаах успуорт маастара, РФ физическэй култуураҕа уонна успуорка үтүөлээх үлэһитэ, Аан дойдуга супермарафон (100км) икки төгүллээх кыайыылааҕа Татьяна Жиркова аатынан марафон буолан ааста.
Тыыннаах эрдэттэн Майаҕа дьиҥнээх успуорт бырааһынньыга буолла. Ол курдук сарсыардаттар саҕалаан стартовай пакеттары түҥэттилэр, Татьяна Жирковаҕа анаммыт улахан быыстапканы тэрийдилэр. Марафон кыттааччылара парааттаан киирэн күрэх үөрүүлээх арыллыытын итиэннэ сэрээккэни ыыттылар.
Дьэ уонна 12 чаас 30 мүнүүтэттэн саҕалаан Дмитрий Ходулов аатынан култуура киинин анныттан 500 м, 1000 м, 42,2 км, 10 км, 5 км сүүрдүлэр.
Манна эр дьоҥҥо, 42.2 км уһуҥҥа Чурапчы улууһуттан биллэр марафонец Василий Лукин эрэллээхтик 1 миэстэни ылла, кини кэнниттэн суут пристав байыаһа Эдуард Божедонов 2 миэстэни ылан успуорду сэҥээрээччилэри улаханнык үөртүлэр. Кинилэр кэннилэриттэн Манчаары оонньууларын хас да төгүллээх чөмпүйүөнэ Мэҥэ Хаҥалас улууһуттан Константин Драгунов үсүһүнэн кэллэ.
Быйылгы дьыллаахха Баһылай сүүрэрин өр кэтэһэ-манаһа сатаабыппыт, маҥнай “Тымныы полюһа – Өймөкөөн” марафонугар кыттара дуу диэн санаабыппыт – кыттыбатаҕа онтон араас күрэхтэһиилэргэ, быйылгы Манчаары оонньууларыгар көрбүппүтүгэр уолбут туга эрэ табыллыбакка бэрт кыранан миэстэҕэ тиксибэт түгэннэрэ үөскээбиттэрэ. Ол эрэн хас күн аайы бэдэрээлинэй тыраассаҕа бэрт чэпчэкитик сүүрэ сылдьар Баһылайы көрөн, “бу уолбут син биир тугу эмэ ситиһиэҕэ” диэн эрэнэрбит.
Оттон бүгүн Майа сэлиэнньэтин иһигэр “Василий Лукин из Чурапчи становится чемпионом” диэн ыспартыыбынай диктор биллэриитэ биһиги сүрэхпит ортотунан киирэн, киэн туттуу үрдүк үөрүүтүнэн толордо.
Уолаттарга саҥа ситиһиилэри баҕарыаҕыҥ!
Сэмэн ЖЕНДРИНСКЭЙ