А.А.Саввин аатынан Чурапчытааҕы этнография уонна история түмэлигэр «Үрүҥ торуоска” көрбөттөр декадалара үөрүүлээхтик аһылынна.
Бу декада бүтүн Арассыыйа үрдүнэн сыл аайы алтынньы 15 күнүттэн сэтинньи 15 күнүгэр диэри ыытыллар.
Үөрүүлээх күнүнэн улуус дьаһалтатын социальнай отделын исписэлииһэ Алена Пермякова мустубут дьону эҕэрдэлээн туран, улууска доруобуйаларынан хааччахтаах дьон харгыһа суох сылдьалларыгар уонна адаптивнай спорт сайдыытыгар болҕомто уурулларын сырдатта.
Өрөспүүбүлүкэтээҕи Көрбөттөр уопсастыбаларын Чурапчытааҕы салаатын бэрэссэдээтэлинэн иккис болдьоҕор талыллыбыт Василий Пономарев эҕэрдэ тылы эттэ. Кини декада чэрчитинэн улууска туох тэрээһиннэр былааннаналларын билиһиннэрдэ:
— Биһиги улууска мөлтөхтүк көрөр 75 киһи баар. Олортон 35 киһи уопсастыбабытыгар киирэр. Быйылгы декада чэрчитинэн араас тэрээһиннэр үгэс быһыытынан ыытыллыахтара. Ону сэргэ киин баанньыкка уонна киинэ тыйаатырыгар чэпчэтиилэр көрүллүөхтэрэ. Маны таһынан алтынньы 30 күнүгэр биир сүрүн күрэхпит — Мэҥэ Хаҥалас улууһугар Илин эҥэрдээҕи кубок ыытыллыаҕа. Манна быйыл голбол оннугар волейболга күрэхтэһии буолуоҕа. Биһиги хамаандабыт кыттаары бэлэмнэнэ сылдьабыт.
Тэрээһин иһинэн түмэл научнай үлэһитэ Юрий Толстоухов улуус историятын сырдатан, сэргэх экскурсияны оҥордо.
Маны таһынан тэрээһин кыттыылаахтара викторинаҕа билиилэрин тургутан, остуол оонньууларыгар куоталаһан сэргэхсийиэхтэрэ, бэйэ-бэйэлэрин кытта дуоһуйа кэпсэтэн сынньаныахтара. Ону сэргэ бибилитиэкэ үлэһитэ, отоһут Вероника Маркова айылҕа иҥэмтиэлээх отунан чэй оҥорорго анаан маастар-кылаас ыытыаҕа.
«Үрүҥ торуоска» декада үрдүк таһымнаахтык ыытылларыгар баҕарабын.
Марфа Петрова.