Кини бэрт ыраах сиртэн ыран-сылайан, тоҥон-хатан кэлэрэ. Аҕыйах хонукка оҕолорун, сиэннэрин кытары ахтылҕаннарын таһаараллара, дьэ уонна ыраах Сааскылаахха дуу, Черскэйгэ дуу эбэтэр Большой Невергэ дуу сус гынан хаалара.
Барыта – оройуон дьонун-сэргэтин аһынан-үөлүнэн, эгэлгэ табаарынан толору хааччыйар кыһалҕата этэ.
Михаил Егорович эргиэн систиэмэтигэр 1945 сылтан үлэлээбитэ. Оччолорго оройуоннааҕы заготконтораҕа бултааһыны тэрийээччинэн анаммыта. Икки сыл буолан баран нэһилиэнньэ ытыктабылын ылбыт үлэһит Чурапчы сельпотун бырабылыанньатын бэрэссэдээтэлинэн талыллыбыта. Онтон ыла, райпотребсоюз бырабылыанньатын бэрэссэдээтэлигэр тиийэ эппиэттээх дуоһунастары сүгэн, атыылаһааччылар интэриэстэригэр лоп-курдук отут тахса сыл түбүгүрбүтэ. Кэлин төһө даҕаны бочуоттаах сынньалаҥҥа тахсыбытын иһин, Саха АССР норуотун хаһаайыстыбатын үтүөлээх үлэһитэ, Үлэ Кыһыл Знамята уордьан кавалера райпоҕа экспедитордаабыта.
Михаил Егорович Софронов оройуон уопсастыбаннай олоҕор көхтөөхтүк кыттара. Итини сэргэ райпотааҕы агитзона начаалынньыга этэ. Бу агитзона оройуоҥҥа бастыҥ үлэлээҕинэн биллэрэ.
Дьэ ити курдук, кырдьыыны кыайбыт хомуньуус уоскуйбат сүрэҕэ.
Сэмэн ЖЕНДРИНСКЭЙ