Үлэ быраактыката көрдөрөрүнэн, сайыҥҥы түөрт ыйга сыллааҕы үүт аҥарыттан ордуга ыанар. Итинтэн даҕаны сыл бу кэмэ ордук эппиэттээҕэ тута көстөр уонна үлэ бу салаатыгар сылдьар дьонтон – ыанньыксыттартан, бостууктартан, арыы сыаҕын маастардарыттан үлэни тэрийээччилэригэр тиийэ бэйэҕэ баар кыаҕы толору туһанан, дьулуурдаахтык үлэлиири эрэйэрэ.
Ферма бостууга ынахтарын мэччирэҥнээх сирдэринэн уларыта сылдьан аһатыыта өлгөм үүтү ылыы төрдө буоларын хас биирдии тустаах үлэһит өйдүүрэ. Ылан көрүөҕүҥ Карл Маркс аатынан сопхуос Булгунньахтааҕы ферматын. Оччотооҕу 1978 сыллаахха, манна 112 ынах сайылаан турара. Фермаҕа хаһыс да сыл ССКП чилиэнэ Татьяна Николаевна Терютина старшайдаабыта. Кэлэктиип сайыҥҥы ыйдарга үүтү ыаһыҥҥа сопхуоска инники күөҥҥэ иһэрэ. Ити ситиһиигэ ферма бостууга, комсомолец Спиридон Макаров үтүөтэ-өҥөтө улахан этэ.
Кини ити сыл орто оскуоланы бүтэрэн баран “Оскуола-производство-үрдүк үөрэх” девиһинэн производстваҕа быһаччы үлэлии тахсыбыта. Уолчаан киниэхэ сүктэриллибит эбээһинэһигэр үтүө суобастаахтык сыһыаннаһан, ынахтарын үүнүүлээх сирдэринэн кичэллээхтик үүрэн мэччитэрэ, ыамҥа биир да ынах хойутаабатын туһугар бары күүһүн уурара. Ол түмүгэр ферма сайыҥҥы икки ыйга биир фуражнай ынахтан үүтү ыаһыҥҥа ылыммыт эбэһээтэлистибэтин куоһаран 523-түү киилэни ыабыта. Оттон түөрт ыйга тиэрдиллибит былааннарын ыанньыксыттар 69,2 бырыаһыаҥҥа тиэрдибиттэрэ.
Фермаҕа нэдиэлэ аайы үрүҥ илгэни ылыыга график тиэрдиллэрэ. Ону кэлэктиип куруутун аһара толороро. Холобура, биир нэдиэлэҕэ график 62 центнер эбит буоллаҕына, ол 20-чэ центнеринэн аһары туолара.
Сэмэн Жендринскэй