Бүгүн улуус дьаһалтатын аактабай саалатыгар Чурапчы улууһун культурнай кодун булууга бастакы сүбэ мунньах ыытылынна. Мунньаҕы Чурапчы улууһун култуура салалтатын начаалынньыга Петр Гуляев модератордаан ыытта.
Кыттыыны ыллылар: Дьокуускай куоракка олорор биир дойдулаахтарбыт, норуот суруйааччыта Семён Попов — Сэмэн Тумат, худуоһунньук Александра Бочкарева — Иннокентьева — Сууралдьыма Куо, култуура уонна искусство диэйэтэллэрэ Ольга Харайбатова, Алексей, Мотрена Павловтар, Валерий, Мария Герасимовтар. Чурапчыттан үөрэх, спорт, култуура, ыччат эйгэтиттэн, улуус, Чурапчы нэһилиэгин дьаһалтатын үлэһиттэрэ, уопсастыбаннас кыттан, санааларын, көрүүлэрин эттилэр.
«Культурнай код — диэн өбүгэлэртэн бэриллибит хааммытыгар илдьэ сылдьар уникальнай уратыбыт буолар», — диэн Ольга Михайловна эттэ. “Мас силистээҕин — мутуктааҕын кэриэтэ өбүгэлэрбититтэн Боотур Уустан, Улуу Кудаҥсаттан саҕалыахтаахпыт», — диэн Сууралдьыма Куо санаатын тиэртэ.
Чурапчылар биһиги хас биирдии эйгэҕэ тирэҕирэр дьонноохпут-сэргэлээхпит. Историябыт чинчиллибитэ, ырытыллыбыта. Баар, оҥоһуллубут үлэни бэрээдэктээн, ыйан-кэрдэн биэрэн үлэни саҕалыахха диэн мунньах кыттыылаахтара эттилэр. Мантан ыла элбэх сүбэлэһии, кэпсэтии тахсыаҕа. Барыгытын көхтөөхтүк кыттан улууспут ураты бэлиэтин (кодун) буларга уонна арыйарга биир ситимнээхтик үлэлиирбитигэр ыҥырабыт.
Бу улахан үлэ түмүгэ — кэнэҕэски көлүөнэҕэ хаалыахтаах. Үлэни култуура уонна искусство судаарыстыбаннай арктическай института техническэй сорудах быһыытынан ыытара былааннанар.
Кыттааччылар бары биири бэлиэтээтилэр — чурапчылар туруу үлэһит дьоммут диэн. Онон, ыччаппытыгар хаалларар биир сүдү үлэ тула мустуоҕуҥ, үлэлиэҕиҥ — хамсыаҕыҥ.
Мария Васильева.