Бүгүн, Чурапчы улууһугар II-с төгүлүн “Үөрэх – туруктаах сайдыы төрдө” илин эҥэрдээҕи форум сэттэ оройуонтан 200-кэ киһини түмтэ.
Икки күннээх форум алта былаһааккаларыттан биир сүрүннэрэ, сахалартан бастакы лингибиис-учуонай Семен Новгородов аатынан Чурапчы орто оскуолатын мунньахтыыр саалатыгар ыытылла турар. “Муниципальнай тэриллиилэр социальнай-демографическай кыһалҕалара” диэн ааттаммыт былаһаакканы “Чурапчы улууһа” МТ баһылыгын социальнай боппуруостарга солбуйааччы, СӨ үөрэҕин туйгуна Мария Кронникова иилээн-саҕалаан ыытта.
Барыта холбоон 30-тан тахса киһи кыттыыны ылла, кинилэр ортолоругар сэттэ оройуонтан улуус баһылыктарын социальнай боппуруостарга солбуйааччылар, нэһилиэк баһылыктара, баһылыгы солбуйааччылар улуус дьокутааттарын Сэбиэтин бэрэссэдээтэллэрэ, тыа сирин түөлбэтин баһылыктара, исписэлиистэрэ, илин эҥэр улуус уопасатыбаннаһа кыттыыны ыллылар.
Кыттааччылартан бастакынан Мария Филипповна “Ыал саргыта” муниципальнай бырагыраамма туһунан кэпсээтэ.
Онтон салгыы Мэҥэ Хаҥалас оройуонун баһылыгын социальнай боппуруостарга солбуйааччы Альбина Григорьева,
Таатта оройуонун баһылыгын социальнай боппуруостарга солбуйааччы Святослав Сунхалыров, Амма оройуонун дьокутааттарын Сэбиэтин бэрэссэдээтэлэ Владимир Колосов,
Уус Алдан оройуонун баһылыгын социальнай боппуруостарга солбуйааччы Анатолий Сторожев,
“Кытаанах нэһилиэгэ” тыа сирин түөлбэтин баһылыга Егор Потапов, Чурапчытааҕы саастарын ситэ туола илик оҕолору социальнай-реабилитациялыыр киин дириэктэрэ Мария Саввина,
Чурапчы улууһунааҕы ЗАГС управлениетын начаалынньыга, улуус дьахталларын Сэбиэтин бэрэссэдээтэлэ Анастасия Афанасьева, Чурапчы улууһун нэһилиэнньэтин дьарыктаах буолуу киин салайааччыта Софрон Осипов олус туһалаах иһитиннэриилэри, этиилэри киллэрдилэр.
Бу кэпсэтиигэ түмүктүүр резолюцияны сарсын о.э сэтинньи 20 күнүгэр ылыныахтара.
Сэмэн ЖЕНДРИНСКЭЙ