Хоптоҕоҕо отчуоту 100-тэн тахса киһи иһиттэ, үлэни сөптөөҕүнэн сыаналаатылар.
Отчуот үөрүүлээх аһыллыытыгар Сахаяна Павлова балыыһаҕа анаммыт саҥа массыына күлүүһүн туттарда.
Нэһилиэнньэ сүрүннээн тыа хаһаайыстыбатын, каадырынан хааччыллыы, цифровизация, социальнай көмөлөр, хамнас туһунан ыйытта.
Оскуола дириэктэрэ Егор Адамов дэриэбинэҕэ дүөдэлэр сиҥнэн, кыһалҕалары үөскэтэллэрин, ону бөҕөргөтөргө көмө наадатын эттэ. Оскуолаларга агро кылаастары тэрийии туһунан ыйытта.
Кулууп дириэктэрэ Кирилл Пестерев саҥа кулуубу уонна уһуйааны туруоруста.
Лира Винокурова тыа хаһаайыстыбатын престиһин үрдэтэргэ уолдьаспытын, сүөһү көрөөччү пенсияҕа тахсар ИПК-тын үрдэтэргэ, эдэр ыччаты тардар сыалтан бырагыраамалары үлэлэтэргэ диэн этиилэри киллэрдэ.
Антонина Собакина Аксения Посельская үбүлүөйдээх сылынан саҥа Оҕо ускуустуба оскуолатын туруоруста.
Нэһилиэк ытык кырдьаҕаһа Семен Сергеев 20 сыл үлэлээбит ыанньыксыты пенсияҕа таһаарар гына сокуон ылылларыгар үлэлэһэллэригэр эттэ.
Дириҥнээҕи балыыһаттан Олеся Иванова былырыын саҥа балыыһа дьиэтэ үлэҕэ киирэн, быйыл саҥа массыыналанан, олохтоохтор ааттарыттан махтанна. Санатан эттэххэ, бу балыыһаҕа Хадаар, Хайахсыт, Чакыр нэһилиэктэрэ эмиэ көрдөрүнэллэр, анаалыс туттараллар.
Отчуот кэнниттэн үлэлиир бөлөх уһуйааны, спорт саалатын көрдө-иһиттэ, ону таһынан дьону кытта биирдиилээн көрүстэ.
Елена Макаринская