Хайахсыт нэһилиэгэр Ксения Петрова салайааччылаах “Ай Тик” дьахталлар түмсүүлэрэ, 2024 сыллаахха кулун тутар ыйтан саҕалаан “Добровольцы” өрөспүүбүлүкэтээҕи волонтерскай хамсааһын (сал. Светлана Архипченко) филиала буоланнар үлэлэрин саҕалаабыттара.
Бу кэм устатыгар, түмсүү чилиэттэрэ биир даҕаны күнү көтүппэккэ, барыта холбоон 211 о.э 3165 квадратнай миэтэрэ усталаах хаххалыыр сиэккэни өрөннөр анал байыаннай дьайыы кыттыылаахтарыгар улахан көмөнү оҥордулар. Итини сэргэ, өссө былырыын, этиҥ түспүт маһыттан 400-кэ харысхалы оҥороннор эмиэ байыастарга ыыппыттара.
“Биһиги түмсүүбүтүгэр 20-чэ дьахтар баар. Сиэккэни өрөр матырыйаалбытын барытын куораттааҕы “Добровольцы” хамсааһын хааччыйар, ону барытын бэйэбит куораттан аҕалтаран өрөн саҕалаабыппыт.
Олус күүскэ, сынньалаҥа суох Елена Федулова, Екатерина Монастырева, Аграфира Яковлева, Агафья Поисеева үлээбиттэрин тоһоҕолоон бэлиэтиэхпин баҕарабын, кинилэри сэргэ үлэ чааһын кэнниттэн киэһэ хойукка диэри Надежда Поисеева, Анна Монастырева, Елена Борисова улахан күүс-көмө буолуллар. Манна даҕатан эттэххэ, биһиэхэ дьокутааппыт Егор Анемподистов, тугу эттибит даҕаны быһа гыммакка барытын толорон өйөбүл буолар. Биһиги үлэбитин-хамнаспытын истэннэр, Мырыла бөһүөлэгэр кэлин филиал тэриллибитэ. Чурапчытааҕы институт үлэһиттэрэ итиэннэ Мындаҕаайы бөһүөлэгиттэн сибээскэ тахсаннар сүбэ-ама ылбыттара.
Дьокуускай куоракка аан бастакытын ыытыллыбыт волонтердар кэнсиэртэригэр биһиги түмсүүбүтүттэн Ольга Федотова уонна Анна Поисеева кыттан кэлбиттэрэ”, — диэн “Ай Тик” түмсүү салайааччыта Ксения Иннокентьевна кэпсээтэ.
Сэмэн ЖЕНДРИНСКЭЙ