Олохтоох көҕүлээһини өйүүр программанан (ППМИ) республикаҕа сыллата араас хайысхалаах бырайыактар оҥоһуллан үлэҕэ киирэ тураллар. Бу программа ордук тыа сирэ сайдарыгар, тупсарыгар улахан күүс-көмө, өйөбүл буолар.
Хадаар нэһилиэгэ 2026 сылга 2 бырайыагы ылбыта. Нэһилиэк ис суолун тупсарыы уонна нэһилиэк түөлбэлэрин икки ардыларыгар ыытыллар «ЗИМНИЕ СЕЛЬСКИЕ ИГРЫ» күрэхтэр буолаллар. Бу күрэх ыытылларыгар 2 мөл. 660 тыһ. солк. харчы көрүлүннэ. Мантан субсидия суумата 2 мөл, олохтоох бүддьүөттэн 300 тыһ., спонсорство 300 тыһ., олохтоох нэһилиэнньэ хомуйуутунан 60 тыһ. солк. Манна этиэххэ наадалаах, сыл ахсын биһиги нэһилиэкпит бу программаҕа кыттан, нэһилиэк олохтоохторо утары үбүлээһини куруутун өйүүллэр, кыттыһаллар. Уопсай куоластааһынынан икки бырайыакка хас биирдии нэһилиэк олохтооҕуттан (ул.дьон) 2 тыһ. хомулунна. Түөлбэ салайааччыларыгар Л.И.Лукинаҕа «САРДАҤА», З.Н.Теренковаҕа «ЭРЭЛ», З.Е.Лукинаҕа «КЭСКИЛ», нэһилиэкпит олохтоохторугар кыттыбыттарыгар истиҥ махталбытын тиэрдэбит.
«ЗИМНИЕ СЕЛЬСКИЕ ИГРЫ» бырайыак биир дойдулаахпыт, ЧГИФКиС старшай преподавателэ, аспирант, СӨ ыччат политикатын уонна ФК туйгуннара, СӨ хотугу многоборьеҕа маастара, Арассыыйа сүүрүүгэ маастарга кандидата Василий Васильевич Лукин диссертационнай үлэтин чэрчитинэн оҥоһуллан, олохтоох көҕүлээһини өйүүр программанан (ППМИ) кыайан олоххо киирдэ. Василий Васильевич нэһилиэк олохтоохторугар бу сыл иһигэр лекциялары, дьарыктары, маастар-кылаастары, сүбэ мунньахтары ыытта. Кини бу кыһыҥҥы оонньуулар манан түмүктэнэн хаалбакка, салгыы сайдан, бастыҥнары, чаҕылхай көрдөрүүлээхтэри сайыннаран, бу көрүҥнэри улахан спортка, Арассыыйа таһымыгар таһаарар былааннаах. Көрүллүбүт субсидияттан 1 мөл. 300 тыһ.солк. нэһилиэнньэҕэ саҥа спортивнай инвентарь ылыллан, инникитин спортка төһүү күүс буолуо диэн эрэнэбит.
«ЗИМНИЕ СЕЛЬСКИЕ ИГРЫ» бастакы түһүмэҕэ муус устар 18 күнүгэр Үрүҥ-Күөл эбэ тула хайыһарга биирдиилээн, түөлбэнэн бастыыр иһин сүүрүүлэринэн саҕаланна. Күн-дьыл туруга туран биэрэн хайыһардьыттарга да, көрөөччүлэргэ да харгыстары үөскэппэккэ, кыттааччылар дьаныардаахтык күрэхтэстилэр. Кылаабынай судьуйанан Василий Васильевич Лукин уонна ЧГИФКиС устудьуоннара үлэлээтилэр.
Өрөспүүбүлүкэҕэ аан бастакынан ыытыллыбыт «ЗИМНИЕ СЕЛЬСКИЕ ИГРЫ» элбэх кыттааччыны, сэҥээрээччини муста. Муус устар 24-25 күннэригэр дуобат, саахымат, дартс, полиатлон, дьиэ кэргэн, доярдар, механизатордар күрэхтэрэ салгыы түһүмэхтэринэн барыа. Күрэхпит түмүктэнэн кыайыылаахтары быһаарар долгутуулаах түгэммит үүнүө. Олохтоох көҕүлээһини өйүүр программа (ППМИ) нэһилиэк сайдыытын түстээн, инникитин биир киһи курдук көхтөөхтүк кыттан, салҕыы сайдан иһиэҕиҥ диэн нэһилиэкпит олохтоохторун ыҥырабыт!
Мария Давыдова, Перизат Дьячковская, Николай Дьячковскай хаартыскаҕа түһэриилэрэ.