СӨ Экэниэмикэ миниистирин солбуйааччы Иван Елисеев салайааччылаах отчуоттуур иккис бөлөх Хадаар нэһилиэгэр үлэлээтэ. Дэлэгээссийэ састаабыгар СӨ Успуорт уонна физическай култуура миниистирин солбуйааччы Гаврил Мохначевскай, СӨ Сыана бэлиитикэтин Судаарыстыбаннай кэмитиэтин бэрэссэдээтэлин солбуйааччы Герасим Гуринов, СӨ Бырамыысаланнас уонна геология миниистирин солбуйааччы Антон Андросов, улуус баһылыгын бастакы солбуйааччыта Рустам Данилов уо.д.а. улуус туһааннаах тэрилтэлэрин салайааччылара, бэрэстэбиитэллэрэ бааллар.
Хадаарга СӨ Ситэриилээх былааһын 2024 сыллааҕы үлэтин отчуотун мунньаҕар 60 киһи сырытта. Бөлөх салайааччыта Иван Елисеев Улуу Кыайыы 80 сылынан үбүлүөйдээх мэтээли нэһилиэк ытык кырдьаҕастарыгар, тыыл, үлэ бэтэрээннэригэр Марфа Никитинаҕа уонна Дмитрий Лукиҥҥа туттарда.
Салгыы 2024 сылга ыытыллыбыт үлэни-хамнаһы сырдатта. Сүрүн дакылаат кэнниттэн олохтоохтортон 25 ыйытыы киирдэ. Үгүс боппуруос тыа хаһаайыстыбатын эйгэтигэр сыһыаннаах буолла. Ол курдук, дьаһал кыттыылаахтара үүт харчытын үрдээһинин, сибиинньэ оҕотун атыылаһыы, бэтэринээрдэр тутар анаалыстарын сыанатын, каадыр боппуруоһун быһаарыы, саҕалааччы пиэрмэрдэргэ көрүллэр көмөлөр, субсидия уо.д.а туһунан боппуруостарыгар туһааннаах салайааччылартан сөптөөх эппиэттэри иһиттилэр.
Этиилэргэ киирдэххэ, оскуола өрөмүөнэ сытыы буоппуруоһунан турда. Ону сэргэ уһуйаан сирин алдьаныытын оҥорорго, нэһилиэктэн Абалаах суолугар тахсар суол өрөмүөнүн уонна Синньигэс үрэҕи туоруур муоста тутуутун туруорустулар.
Мунньах түмүгүнэн олохтоохтор СӨ Ситэриилээх былааһын 2024 сыллааҕы үлэтин отчуотун сөптөөҕүнэн сыаналаатылар.
Марфа Петрова.