Мэҥэ Хаҥалас улууһун Майа сэлиэнньэтигэр, Дмитрий Ходулов аатынан култуура киинигэр муус устар 4-5 күннэригэр көр-күлүү, айар талаан уонна тобуллаҕас өй түһүлгэ олохтонно. Икки күннээх, түөрт түһүмэхтээх тыҥааһыннаах оонньуу кэнниттэн бастыҥнар ааттаннылар диэн СӨ “Саха КВН Лигата” ыччат уопсастыбаннай тэрилтэтин пресс-сулууспата суруйда.
XXIII-с өрөспүүбүлүкэтээҕи оскуола оҕолорун “Саха КВН” оонньууларын финала сэттэ улуустан: Тааттаттан, Амматтан, Чурапчыттан, Уус Алдантан, Мэҥэ Хаҥаластан, Горнайтан уонна Ньурбаттан аҕыс хамаанданы түмтэ. Чопчулаан бэлиэтиир буоллахха, бу ааттаммыт улуустар кыһыҥҥы уонна сааскы кэмҥэ улуустааҕы сүүмэрдиир түһүмэхтэрин тэрийбиттэрэ. Иннэ гынан сылын ахсын финалга ордук бэлэмнээх, чаҕылхай бырагыраамалаах, талааннаах оонньооччулардаах хамаандалар тахсаллар.
Кыттааччылар «Эҕэрдэлэһии», «Триатлон», «Биир нүөмэр түһүмэҕэ», «Музыкальнай дьиэҕэ сорудах» диэн түһүмэхтэринэн бырагыраамаларын киэҥ дьүүлгэ таһаардылар, бастыҥ көрүдьүөстэринэн көрөөччүлэри уонна дьүүллүүр сүбэни сөхтөрдүлэр. Онтон хас биирдии реприза, миниатюра, нүөмэр сыанаҕа тахсыан иннинэ эрэдээксийэни ааһарын, чочулларын биитэр сарбылларын үгүс киһи билбэт буолуохтаах.
“Былырыыҥҥы оонньуутааҕар быйылгы финал таһыма быдан үрдүк. Ааттаах-суоллаах, урукку өттүгэр балайда ситиһиилээх хамаандалар бу да сырыыга инники күөҥҥэ тахсыахтара дии санаабыппыт, онуоха саҥа ааттар ордук сэргэхтик көһүннүлэр. Кыайбыт «Дьүлэй дьээбэлэрэ» хамаанда бары өттүнэн чаҕылхайдык көһүннэ уонна, атыттарга холоотоххо, лаппа элбэх баалынан утарсааччыларын кэннигэр хаалларда. Сыанаҕа тутта-хапта сылдьаллара, уорбараска киирэллэрэ, нүөмэрдэрин итэҕэтиилээхтик толороллоро уонна, ордук, ыллыыр дьоҕурдаахтара барыбытын сөхтөрдө”, – диэн быһааран кэпсиир “Саха КВН” оонньууларын шеф-эрэдээктэрэ, тэрээһин сүрүн көҕүлээччитэ Евгений Филиппов.
Манна биэс бойобуой уордьаннаах саллаат Семен Флегонтов аатынан Хадаар орто оскуолатыттан “Хадаар абытайдара” — “Наара суох” анал аат хаһаайыннарынан буоллулар. Үөрэнээччилэргэ ситиһиилэри баҕарыаҕын!
Сэмэн Жендринскэй