Номнуо сайыммыт аҥара буолла. Ол эрэн кылгас сайыммытын мүлчү туппакка, туһалаахтык уонна сынньалаҥнык атаарар барыбыт соруга. Үүнэн эрэр кэнчээри ыччаппыт уһун унньуктаах үөрэх кэнниттэн сынньана түһээт, тус интэриэстэринэн араас сайыҥҥы лааҕырдарга сылдьаллар.
Быйыл “Саха” НКИХ Чурапчытааҕы филиалын үлэһиттэрэ Нарьяна Бурцева уонна Анна Семенова көҕүлээһиннэринэн, аан бастакытын “Эн кэмин” сайыҥҥы былаһаакканы үлэлэттилэр.
“Оҕо саҥарар саҥатын, айар дьоҕурун сайыннарар “Эн кэмин” былаһааккабыт от ыйын 1 – 10 күннэригэр үлэлээтэ. Бастакы сезоҥҥа 17 оҕо сырытта. Оҕолор “Ералаш” курдук тэттик киинэлэргэ уһулуннулар, биэрии ыытааччытын, блогер, оператор, монтажер быһыытынан холонон көрдүлэр, хайдах интервью, ыйытык ыларга үөрэннилэр. Ону таһынан талааннарын арыйар артыыс маастарыстыбатыгар дьарыктаннылар. Үөрэҕи сэргэ араас оонньуулар, лазертаг, батут тэрилиннилэр”, — диэн Нарьяна Бурцева сырдатта.
Лилия Макарова:
- Мин бу былаһааккаҕа сылдьыбыппыттан астынным. Олус элбэххэ үөрэнним. Видео оҥорорго үөрэнним, оонньуу бөҕөтүн оонньоотум, саҥа оҕолору кытта билсэн, элбэх доҕоттордоннум. Өссө да маннык интэриэһинэй лааҕырдарга сылдьыам этэ.
Бу курдук оҕолор сайыҥҥы уон күнү туһалаахтык, интэриэһинэйдик атаардылар. Үлэһиттэр да, иитиллээччилэр да уонна сүрүнэ төрөппүттэр бу былаһаакка үлэтиттэн астыммыттар. Санатан эттэххэ, сотору былаһаакка иккис сезонун саҕалыа. Суруттарыан баҕалаахтар тэрийээччилэртэн билсиэххитин сөп.
Елена Макаринская