Савва оҕо сылдьан, дьиэтин таһыгар биирдэ эмэ тыраахтыр, массыына тыаһаатаҕына, таһырдьа ыстанан тахсара. Ити модун күүстээх сэптэри тутан-хабан көрүөн олус да баҕарара. Кэнники оскуолаҕа киирбитин кэннэ төрөппүттэрэ: “Көрсүөтүк, сэмэйдик сырыт, үчүгэйдик үөрэн, оччоҕо улааттаххына массыынаны да үлэлэтиэҕиҥ”, — диир буолбуттара.
Төрөөбүт-үөскээбит Сылаҥар сэттэ кылаастаах оскуоланы бүтэрэн баран колхуоска түөрт сыл араас үлэлэргэ сылдьыбыта. Онтон Сэбиэскэй Аармыйаҕа сулууспалаабыта, дойдутугар ефрейтор званиелаах эргиллэн кэлбитэ. Аҕыйах хонукка сынньана түһэн баран, колхуоһун дьаһалынан “Сельхозтехника” оройуоннааҕы холбоһугар үлэлии киирбитэ. Итиннэ монтажнигынан үс сыл үлэлээбитин кэннэ ЫБСЛКС райкома кинини милииссийэ үлэтигэр ыыппыта. Хомсомуол сорудаҕын толорон, Савва Монастырев икки сыл устата уопсастыбаннай бэрээдэги харыстааһыҥҥа туох баар күүһүн, дьоҕурун ууран үлэлээбитэ.
Итинтэн салгыы Дьокуускайга суоппардар түөрт ыйдаах куурустара аһыллыбытыгар киирэн үөрэммитэ, дьэ уонна оҕо эрдэҕиттэн баҕа санаа оҥостубут идэтин баһылаан, үһүс кылаастаах суоппар буолан эргиллибитэ, Чурапчы сельпотугар үлэлии киирбитэ.
Бастакы сылларга үлэлииргэ ыарахан этэ. Уопута суоҕа. Уонна суол-иис куһаҕана, массыына да эргэтэ, мөлтөҕө. Савва Иванович онтон санаатын түһэрбэтэҕэ. Дьаныардаахтык үлэлээн идэтин лаппа үчүгэйдик баһылаабыта.
Ол кэмтэн ыла кини ханна да уларыйбакка, биир тэрилтэҕэ үлэлээбитэ. Ол тухары биирдэ суолга алдьанан, сааххалланан турбута диэн суох. Туох кистэлэҥэ баар буолуой, массыынатын куруутун көрүнэ-истинэ, быстах да, улахан да алдьаныыны бэйэтэ оҥосто сылдьара.
Бииргэ үлэлиир табаарыстара Савва Ивановичка мэлдьи көмөлөһө, сүбэлии сылдьарын иһин истиҥник махтаналлара, ытыктыыллара. Бастыҥ үлэһит уопсастыбаннай үлэлэргэ эмиэ көхтөөхтүк кыттара. Чурапчы сельскэй Сэбиэтигэр үс төгүл дьокутаатынан быыбардаммыта. 1973 сылтан ыла партийнай тэрилтэ бюротугар сыл ахсын чилиэнинэн талыллара.
Савва Иванович Монастырев өр сыллаах эҥкилэ суох үлэтэ үрдүктүк сыаналаммыта. Кини Ленинскэй үбүлүөйүнэй мэтээлинэн, элбэх грамоталарынан наҕараадаламмыта, үгүстүк бириэмийэлэммитэ.
Сэмэн Жендринскэй