Бэҕэһээ, Дьокуускай куоракка “Креативнай индустрияны салайар маастар” диэн эрэгийиэҥҥэ култуурунай ландшафт тутулун уларытар 19 бырайыактаах киэҥ хабааннаах бырагыраамма-үөрэх түмүктэннэ.
Үс ый устата, 252 чааһы мэлдьи быыһа суох үөрэх Арктикатааҕы култуура уонна ускуустуба судаарыстыбаннай үнүстүүтэ уонна СӨ Баһылыгын иһинэн инновационнай менеджмент Үрдүкү оскуолатын кытары холбоһуктаах бырайыактарын иилэринэн тэрилиннэ.
Манна элбэх үлэ көрүлүннэ ол эрэн экспертнэй хамыыһыйа сүрүн болҕомтотун Чурапчы улууһуттан “Тоҕус томтор ыллыгынан” (“Девять холмов Чурапчи”) бырайыак тарта.
Бырайыак ааптардара Иван Винокуров аатынан “Айылгы” НАДь-тин дириэктэрэ Розалия Игнатьева, Одьулуун нэһилиэгин “Сайдыс” НАДь-тин айар салаатын исписэлииһэ Сайаана Дьяконова, Иван Винокуров аатынан “Айылгы” НАДь-тин дириэктэрин эргиэн боппуруостарыгар солбуйааччы Алена Саргыдаева, Егор Борисов аатынан Чурапчытааҕы киин архыып-бибилэтиэкэ үлэһитэ Вероника Маркова, Чурапчы улууһун култуураҕа салаатын методиһа Данил Николаев, Чурапчы улууһун “Тускул” киин методиһа Сардана Софронова буоланнар инновационнай быһаарыныыны ылынаннар, томтордору интэриэһиргээччилэр куар-код көмөтүнэн, томтордор тустарынан үһүйээннэри сахалыы, нууччалыы, инникитин англия тылынан истэллэригэр кыах үөскүөхтээҕин туһунан сырдаттылар. Инньэ гынан култуурунай нэһилиэстибэни тыыннааннар инникитин баҕалаах дьон үөрэтэригэр аартыгы арыйыахтара.
Экспертнэй хамыыһыйа бэрэстээтэллэринэн, СӨ Ил Дарханын сүбэһитэ Ирина Якушева уонна инновационнай менеджмент Үрдүкү оскуолатын ректора Василий Миронов үлэлээтилэр. “Бу да сырыыга биһиги, тыа сиригэр даҕаны олус талааннаах, сонун көрүүлэрдээх, бэйэлэрин дойдуларын олуһун таптыыр, саҥаттан-саҥа бырайыактарын дьиҥ-чахчы олоххо киллэрэ үөрүйэхтээх дьон олохсуйан олороллоругар өссө төгүл итэҕэйдибит, улаханнык астынныбыт. Бу күннэргэ локальнай идеялартан саҕалаан глобальнай инициативаларга тиийэ киэҥ араҥаны хабааһын – бу буолар, биһиги бырагырааммабыт бастыҥ түмүктэрэ. Бу – саҕалааһын эрэ. Сүрүн түмүгү – ылбыт билиилэрин төһө олоххо киллэрэн быраактыкаҕа туһаныыларыгар көрүөхпүт”, — диэн Ирина Семеновна эттэ.
Итинтэн да көстөрүнэн “Тоҕус томтор ыллыгынан” бырайыак Чурапчы улууһугар култуурунай нэһилиэстибэни харыстааһыҥҥа итиэннэ туризм сайдыытыгар инникилээҕин көрдөрдө. Бырайыак ааптардара кэлэр 2026 сылга өссө эбии ситэрэн-хоторон Граҥҥа киирсэр санаалаахтарын биллэрэллэр.
Сэмэн ЖЕНДРИНСКЭЙ