Бу күннэргэ РФ Бэрэсидьиэнин пуондатын гранын иккис куонкуруһун кыайыылаахтара билиннилэр. Онуоха 1640 кэммиэрчэскэйэ суох тэрилтэ бу граҥҥа тигистэ. Чурапчы улууһуттан дьон-сэргэ доруобуйатын харыстааһын, чөл олоҕу тарҕатыы хайысхатыгар “Боотурдарга анаммыт спорт төрүт көрүҥнэрин сайыннарыы территорията” диэн бырайыагынан кыттан, Ольга Кардашевская салайар “Коркинец” кэммиэрчэскэйэ суох тэрилтэ 892 тыһ. 835 солк. суумалаах граны ылары ситистэ. Эмиэ бу хайысхаҕа “Небесный тихоход” авиамодель куруһуогун тэрийиигэ туһуламмыт кэммиэрчэскэйэ суох тэрилтэ салайааччыта Иннокентий Новгородов бырайыага 486 тыһ.240 солк. граны ылла. Итини тэҥэ үөрэхтээһин, наука, үөрэх эйгэтигэр бырайыактары өйөөһүн хайысхатыгар “Поющие картины” кырачааннар айар лабораториялара диэн «“Туллук” оҕо саас дьоҕус академията” оҕону сайыннарар, өйүүр киин» автономнай кэммиэрчэскэйэ суох тэрилтэ (сал. Светлана Попова) 698 тыһ.440 солк.суумалаах граны көмүскээтэ.
“Коркинец” СО НКО салайааччыта Ольга Кардашевская: “Быйыл саас “Мечтай, твори, действуй!” бырайыак суруйуутугар улуустааҕы куонкурус тэрийбитим. Онно олохтоох урбаанньыттар уонна “Мин бизнеһим” киин өйөөбүттэрэ. Барыта 6 оскуола кыттыбыта. Ол түмүгүнэн икки бырайыак Дойду Бэрэсидьиэнин гранын ыллылар. Сылаҥ оскуолатын Түөйэ учаастагар Боотур территорията үлэлиэҕэ. Оттон Хадаар орто оскуолатын хамаандата култуурунай көҕүлээһиҥҥэ Бэрэсидьиэн пуондатын гранын ылары ситистэ. Маннык куонкурус оҕолор тус идиэйэлэрин олоххо киллэрэллэригэр улахан төһүү буолар”, — диэн үөрэн туран санаатын үллэһиннэ.
Оттон Светлана Попова бырайыагын туһунан маннык сырдатта: “Бу бырайыакпытын 2024 сыллаахха мусукаалынай салайааччыбыт Диана Портнягина идиэйэтинэн уһуйааммыт сэбиэдиссэйэ Альбина Варламова буолан “Айаар” диэн ааттаан мусукаалынай планшет айбыппыт. Онно оҕо бэйэтэ уруһуйдаабыт уруһуйун уган, уруһуйугар туһаммыт өҥнөрүнэн нотаны таһаарар. Ноталары дьүөрэлээн, онтуката муусука буолан кутуллар. Быйыл бырайыакпытын эбии тупсаран, сайыннаран бу куонкуруска кытынныбыт. Маныаха 4 хайысханан устуудьуйалар үлэлиэхтэрэ: ноталары таһаарыы, уруһуй, муусуканы айыы уонна айбыт муусукаларын аудиоҕа устуу. Устуудьуйаларбыт үлэтин түмүгүнэн бэстибээл тэриллиэхтээх. Манна уһуйааммыт кэлэктиибэ биир хамаанда буолан үлэлиэҕэ. Кыра саастаах оҕолору, чуолаан доруобуйаларынан хааччахтаах уонна инбэлиит оҕолору кэрэ эйгэтигэр уһуйууга улахан көдьүүстээх буолара саарбахтаммат”.
Салгыы Грант үһүс кыайыылааҕа Иннокентий Новгородов бырайыагын туһунан маннык кэпсээтэ: “Биэс сыллааҕыта дельтаплан атыылаһан, онтукайбын эбии ситэрэн-тупсаран көппүппүн чурапчылар өйдүүр буолуохтааххыт. Онон оҕо эрдэхпиттэн ыра санаа оҥостубут баҕа санаабын толорон турабын. Ону сэргээн, туоһулаһан, тэҥҥэ көтүһэн көрөргө биир да киһи күн бүгүнүгэр диэри биллэ илик.
Былырыын бу интэриэспин сайыннарар уонна өйөтөр соруктаах кэммиэрчэскэйэ суох тэрилтэ тэринэргэ быһаарыммытым. Бу күннэргэ, үөрүөм иһин, куонкуруска кыайан, граҥҥа тиксибиппин истэн долгуйдум. Бу бырайыак сүрүн соруга – эр дьон, уолаттар тиэхиньикэ, авиация хайысхатыгар бэйэлэрэ толкуйдаан-тобулан, ол-бу тиэхиньикэни өрөмүөннээн, айан, таҥан таһааралларыгар туһуланар. Бэйэм эргэ-урҕа быраҕыллыбыт тиэхиньикэлэр чаастарыттан, деталларыттан таҥан араас тиэхиньикэни оҥоробун. Билигин биир тиэхиньикэни эмиэ оҥоро сылдьабын. Улууспут киининээҕи 4 оскуолаттан, 7-стэн 10-с кылааска диэри саастаах, уопсайа, 40-ча уолу түмэн, авиамодельнай хайысхалаах куруһуогу тэрийиэҕим. Араас көрүҥнээх авиамоделлар кэмпилиэктэрин уонна онно анаммыт матырыйааллары, оборудованиелары атыылаһан куруһуокпар туһаныахтаахпын. Маннык куруһуок улууспутугар аан бастаан аһыллан үлэлиэхтээх. Дьиҥэр, уол оҕо кыра эрдэҕиттэн тиэхиньикэҕэ сыһыннаҕына, олоҕор улаханнык сабыдыаллыыра чахчы. Кэлин ол ыччаттар авиация идэтигэр үөрэнэн, аныгы технологиялары, сэдэх идэлэри баһылаан, дойдуларын сайыннарыахтара. Бу бачыыммын батыһан, оскуолаларга маннык хайысхалаах куруһуоктар сыыйа үлэлиэхтэрэ диэн эрэнэбин. Атырдьах ыйыттан оҕолору хомуйан саҕалыыр былааннаахпын”.
Анна Захарова.