«Култуура» национальнай бырайыак иһинэн үлэлиир «Култуура эйгэтэ» федеральнай бырайыагынан Дириҥнээҕи ускуустуба оскуолатыгар 3 мөлүйүөн кэриҥэ суумалаах саҥа музыкальнай иструменнар, оборудованиелар, литературалар номнуо кэлэн, бүгүн аһыллыыта буолла.
Үөрүүлээх тэрээһиҥҥэ Дириҥнээҕи оҕо ускуустуба оскуолатын дириэктэрэ Айаал Новгородов махтал тыллары эттэ. Кини салайар оскуолатын үлэтин-хамнаһын сырдатта.
Дириҥнээҕи оскуола 1976 сылтан тэриллэн, таһаарыылаахтык үлэлиир. Бу сыллар усталарыгар уопсайа 450 оҕо бүтэрбит. Олортон 65 выпускник култуура эйгэтигэр үлэлииллэр. Күн бүгүн оҕолору фортепиано, живопись, уруһуй, хореография, вокальнай ырыа уонна байаан кылаастарыгар дьарыктыыллар. Маны таһынан Хадаар нэһилиэгэр хуор, уруһуй, Одьулуун нэһилиэгэр вокальнай ырыа эбии кылаастара үлэлииллэр. Уопсайа барыта 130 оҕо дьарыктанар.
Ааспыт үөрэх дьылыгар 24 өрөспүүбүлүкэтээҕи, 10 улуустааҕы, 2 бүтүн Арассыыйатааҕа куонкурустарга үөрэнээччилэр ситиһиилээхтик кыттыбыттар. Оскуола бэйэтэ «Тыа сиригэр бастыҥ ускуустуба оскуолата» Арассыыйатааҕы куонкурус өрөспүүбүлүкэтээҕи түһүмэҕин кыайыылааҕынан буолбут, маны сэргэ Санкт-Петербург куоракка ыытыллыбыт Арассыыйатааҕы «Лига лидеров -2022» куонкурус «Тыа сиригэр бастыҥ оҕо ускуустуба оскуолата» номинацияны ылары ситиспит.
Инники соруктартан билиһиннэрдэххэ, саҥа сылга Чыаппара оскуолатыгар элбэх оҕону хабар хор эбии кылааһын аһылларыгар үлэ ыытыллар.
«Эһиил саха бастакы балерината Аксинья Посельская төрөөбүтэ 100 сылын туолар. Ол чэрчитиэнэн өрөспүүбүлүкэ таһымнаах дьаһаллар былааннаналлар. Бу үбүлүөйдээх сылы көрсө кини үтүө аатын сүгэр оскуолаҕа саҥа оборудованиелар, музыкальнай инструменнар, литературалар кэлбиттэрэ икки бүк үөрүүлээх. Аны саҥа оскуола тутуутугар үлэлэһэбит. Бас билэр эбийиэкпит суох буолан, билигин преподавателлэр оҕолору Дириҥнээҕи орто оскуолаҕа уонна П.Пинигин аатынан спортивнай саалаҕа үөрэтэ сылдьабыт», — диэтэ дириэктэр Айаал Новгородов.
Бэлиэтээн эттэххэ, «Култуура» наҥиональнай бырайыак 2019 сылтан Дойду бэрэсидьиэнэ Владимир Путин ыйааҕынан тэтимнээхтик үлэлиир. Быйыл бу бырайыагынан өрөспүүбүлүкэ үрдүнэн 8 оскуола саҥа оборудованиелары ыллылар.
Марфа Петрова
