Чурапчы улууһун Хоптоҕо нэһилиэгэр муус устар 4 күнүгэр Саха өрөспүүбүлүкэтин култууратын туйгуна, А.В.Посельская аатынан Дириҥнээҕи оҕо ускуустуба оскуолатын байаан кылааһын учуутала, Дириҥнээҕи норуодунай хор аккомпониатора Прокопий Иванович Тарабукин сырдык аатыгар «Байааным алыптаах ырыата» өрөспүүбүлүкэтээҕи ырыа күрэҕэ буолан ааста.
Бу улахан куонкуруһу Дириҥнээҕи норуодунай хор (сал. Ф.И.Попова), Дириҥнээҕи оҕо ускуустубуа оскуолатын коллектива (сал. А.П. Новгородов), Прокопий өр сылларга бииргэ үлэлээбит кэллиэгэлэрэ, уонна дьиэ кэргэнэ, бииргэ төрөөбүттэрэ көҕүлээн-тэрийэн ыыттылар.
Прокопий Иванович Дириҥнээҕи норуодунай хорга өр сылларга ситиһиилээхтик үлэлээбитэ. Салайааччы Саха өрөспүүбүлүкэтин култууратын Үтүөлээх үлэһитэ Фекла Ивановна сүбэтинэн, такайыытынан айымньылаахтык үлэлээн, улууска, өрөспүүбүлүкэҕэ биллэр улахан баянист буола сайдыбыта. Кини байааҥҥа доҕуһуолунан норуодунай хор өрөспүүбүлүкэ араас муннуктарыгар элбэх куонкурустарга кыайыы өрөгөйүн билбитэ, нэһилиэк, улуус култуурунай олоҕор инники күөҥҥэ сылдьыбыта.
Күрэххэ Амматтан, Тааттаттан, Мэҥэ Хаҥаластан, Чурапчыттан, Сунтаартан, Дьокуускай куораттан барыта 26 кыттаачы кытынна. Куонкуруһу сааһынан 2 бөлөххө арааран сыаналаатылар, иһиттилэр.
Дьүүллүр сүбэҕэ Д.Д. Попов –Чурапчы улууһун Култуура управлениятын Олоҥхо киинин салайааччыта, А.В. Васильева – Дириҥнээҕи оҕо ускуустуба оскуолатын вокал кылааһын салайааччыта, А.А. Черноградская – М.Н.Жирков аатынан музыкальнай колледж ырыа салаатын выпускницата, Муусука үрдүкү оскуолатын 2 кууруһун устудьуоуна, Дь.В. Васильев — М.Н.Жирков аатынан музыкальнай колледж баян салаатын выпускнига, АГИКИ устудьуона, Прокопий Иванович үөрэнээччитэ, үлэлээтилэр, түмүгү таһаардылар. Ырыаһыттары сааһынан 2 бөлөххө арааран сыаналаатылар, иһиттилэр. Ол курдук анал ааттары ыллылар: Анна Иванова, Елена Сивцева, Айталина Сивцева, Роман Романов, Валерий Слепцов, Наталья Захарова, Михаил Санников. 18-45 саастаахтарга 3 истиэпэннээх дипломант Радислав Атласов (Чурапчы, Дириҥ), 2 истиэпэннээх дипломант Елена Тотонова (Чурапчы, Чыаппара), 1 истиэпэннээх дипломант Любовь Пинигина (Чурапчы, Дириҥ), 3 истиэпэннээх лауреат Марфа Пахомова (Чурапчы), 2 истиэпэннэх лауреат Дьулустаан Михайлов (Мэҥэ Хаҥалас, Тиэлиги), 1 истиэпэннээх лауреат Анатолий Гуляев (Орто Халыма) буоллулар. 45 саастарыттан үөһэ ырыаһыттарга 3 истиэпэннээх дипломант Александра Андреева (Амма), 2 истиэпэннээх дипломант Спиридон Григорьев (Мэҥэ Хаҥалас, Хара), 1 истиэпэннээх дипломант Аскалон Егоров (Нам), 3 истиэпэннээх лауреат Анастасия Шоломова (Чурапчы, Бахсы), 2 истиэпэннэх лауреат Владимир Николаев (Чурапчы, Мугудай), 1 истиэпэннээх лауреат Иван Егоров ( Чурапчы, Одьулуун) таҕыстылар. Гран При үрдүк аатын Сунтаар улууһуттан сылдьар Иван Аммосов ылла. Кыайыылааха харчынан анал бирииһи Прокопий оскуолаҕа бииргэ үөрэммит доҕотторо туттардылар. Киниэхэ байааҥҥа доҕуһуоллаата Николай Кириллин.
Маны таһынан Прокопий Иванович ийэтэ Мария Лукинична, бииргэ төрөөбүттэрэ, кэргэнэ Матрена Эдуардовна, оҕолоро анал бириистэри анаатылар. Ол курдук байааҥҥа бастыҥ доҕуһуолун иһин Леонид Винокуровка ( Мэҥэ Хаҥалас) уонна үөрэтэн-уһуйан таһаарбыт үөрэнээччитигэр Дьулус Васильевка “Утум салҕааччы” анал ааты туттардылар.
Көрөөччүлэр хас биирдии ырыаһыты , байаан иэйиилээх муусукатын олус истиҥник көрүстүлэр, ытыс дохсун тыаһын бэлэхтээтилэр. Бу ураты күн олус иһирэхтик ааспытын мустубут дьон бэлиэтээтилэр.
Дьоҥҥо куруук сырдыгы, кэрэни саҕа сылдьыбыт Прокопий Иванович сырдык аата өрүү ааттана турдун, байаан дьикти муусуката хаһан да уҕараабатын.
Марфа Далбаева, Дириҥ орто оскуолатын учуутала
Бэлэмнээтэ Сэмэн ЖЕНДРИНСКЭЙ