Быйылгы үөрэх дьылыгар улууспут үөрэҕин кыһаларыгар улахан уларыйыылар буоллулар. Ол курдук ааспыт сырыыга Семен Новгородов аатынан Чурапчы орто оскуолатыгар, Иван Павлов аатынан Чурапчы орто оскуолатыгар, Афанасий Илларионов аатынан Хайахсыт орто оскуолатыгар уонна Роман Константинов аатынан Амма орто оскуолатыгар саҥа салайааччылары анаталааһын тустарынан суруйан турабыт.
Онтон бүгүн о.э. атырдьах ыйын 29 күнүгэр, суруйааччы, литэрэтииринэй кириитик Иван Федосеев-Доосо аатынан Дириҥнээҕи орто агро оскуола улахан кэлэктиибигэр саҥа анаммыт дириэктэри билиһиннэрдилэр. Оскуола учууталлара чахчы даҕаны өр кэтэстилэр, эрдэ бу оскуола дириэктэринэн Михаил Спиридонович Игнатьев 7 сыл устата олус таһаарыылаахтык үлэлээтэ, билигин кини 1000-тан тахса үөрэнээччилээх Семен Новгородов аатынан Чурапчы орто оскуолатын дириэктэринэн ананан сүүрэ-көтө сылдьар.
Дириҥҥэ дириэктэринэн, бэйэлээх бэйэлэрин уоллара Егор Адамов ананна. Егор Владимирович 1987 сыллаахха сэтинньи 6 күнүгэр күн сирин көрбүтэ. 2012 сыллаахха Максим Аммосов аатынан ХИФУ үрдүкү үөрэҕин кыһатын бүтэрэн филолог преподаватель идэтин баһылаабыта. Үлэтин 2013-2016 сылларга Дириҥнээҕи орто агро оскуолаҕа педагог-организатор быһыытынан саҕалаабыта. Онтон эбии үөрэҕи ааһан, 2016-2017 сылларга төрөөбүт оскуолатыгар устуоруйа уонна обществознание предметтэригэр учууталлыыр. Салгыы 2017-2021 сылларга Д.Г. Барашков аатынан Бахсы орто оскуолатыгар дириэктэринэн ананан үлэлээбитэ. 2021-2022 сылларга Чурапчы улууһун үөрэҕин салаатыгар кылаабынай исписэлииһинэн оттон 2022-2024 сылларга Хоптоҕо нэһилиэгин баһылыгын солбуйааччынан үлэлээн кэллэ.
Сэмэн Жендринскэй