Быйыл быыбар үс күн устата, балаҕан ыйын 18-20 күннэригэр ыытыллар. Норуот Арассыыйа Федерациятын Судаарыстыбаннай Дууматын IX ыҥырыылаах дьокутааттарын, Саха Өрөспүүбүлүкэтин норуодунай дьокутаатын талаллар.
Бүгүн, балаҕан ыйын 18 күнүгэр, Чурапчы нэһилиэгин 684 нүөмэрдээх учаастагар быыбар көхтөөхтүк саҕаланна. Биир бастакынан Светлана, Афанасий Захаровтар, Елена, Григорий Батариннар, Евдокия, Иван Лукиннар дьиэ кэргэнинэн кэлэн куоластаатылар.
«Быйылгы быыбарга кэргэмминээн Светланан Семеновналыын бастакынан кэлэн, бэйэбит гражданскай, ытык иэспитин толорон куоластаатыбыт. Барыгытын бу суолталаах, үс күннээх быыбарга кыттаргытыгар ыҥырабыт”, — диэн Афанасий Захаров быыбардааччылары ыҥырда.
Елена Батарина: «Кэргэмминиин сарсыарда 8 чаастан учаастакпытыгар кэлэн куоластаатыбыт, сөптөөх кандидатураларбытыгар куоласпытын биэрдибит дии саныыбын», — диэн санаатын үллэстэр.
“Биһиги дьиэ кэргэн сыл ахсын быыбарга хайаатар да кыттыыны ылабыт, быыбардааһын хас биирдии киһи ытык иэһэ буолар. Дойдубут сайдарын, барыта үчүгэй буоларын туһугар куоластыыбыт буоллаҕа», — диэн Иван Лукин санаатын эттэ.
«Биһиги быыбардыыр учаастакпыт куоластааччытын уопсай ахсаана – 1181, билигин баар миэстэтигэр сайабылыанньа суруйан 61 быыбардааччы эбилиннэ, атын сиргэ куоластыырга сайабылыанньа суруйан 108 куоластааччы көҕүрээтэ. Быйылгы быыбарбыт олус көхтөөхтүк саҕаланна, ол курдук, 10 мүнүүтэ иһигэр уонтан тахса киһи кэлэн куоластаата. Ытыктабыллаах быыбардааччылар! Дойдугутугар ытык иэскитин толорон, быыбарга көхтөөхтүк кыттыҥ диэн ыҥырабын», — диэн Чурапчытааҕы 684 нүөмэрдээх быыбардыыр учаастак бэрэссэдээтэлэ Ольга Баишева билиһиннэрдэ.
Быыбар кэмигэр куоластааһын хаамыытын уонна быыбар сокуонун тутуһууну уопсастыбаннай кэтээн көрөөччүлэр маныыллар.
Быыбарга көхтөөх кыттыыны ылыы — хас биирдии киһи бэйэтин инники олоҕун уһансар кыаҕа буолар. Онон бу үс күннээх быыбарга көхтөөхтүк кыттыҥ.
Людмила Горохова.