Бу күннэргэ Туймаада хочотугар норуоттар икки ардыларынааҕы “Оҕо аймах педагогиката: үөрэх эйгэтигэр тылы, култуураны чөл хаалларыы” билим-быраактыка кэмпириэнсийэтин иитинэн уһуйааччылар мастарыскыайдара үлэлээтэ.
Ол курдук араас тэрээһиннэр ыытыллаллар. Холобура бүгүн үнүстүүт иһинэн оҕону ийэ тылга сыһыарарга саҥа технологиялары туһаныы, үлэ көрүҥнэрин туһунан олус интэриэһинэй, иитээччилэр мастарыскыайдара киэҥ эйгэҕэ таҕыста. Саха сириттэн ону ааһан Бурятияттан тиийэ кэлэннэр бэйэлэрин уһуйааҥҥа үлэлэрин сырдаттылар. Бу тэрээһиҥҥэ барыта холбоон тыһыынчаттан тахса киһи кыттыыны ылла. Тэрийээччилэр этэллэринэн бары улуустартан кэриэтэ кэлбиттэр, ону таһынан, биидьийэ-кэмпириэнсийэ сибээһинэн тэйиччиттэн эмиэ кыттыыны ыллылар.
Маннык улахан түһүлгэҕэ, Чурапчы нэһилиэгин “Куоҕалы” түөлбэтигэр үлэлэии турар “Туллукчаан” уһуйаан (сэбиэдиссэй Альбина Варламова) кэлэктиибэ “Оскуолаҕа киириэн иннинээҕи оҕо олоҕор оонньуу: СӨ үөрэҕириитигэр оскуолаҕа киириэн иннинээҕи саастаах оҕо сайдыытыгар быраактыка уонна методическэй идиэйэлэр” диэн өрөспүүбүлүкэтээҕи быыстапка муҥутуур кыайыылаахтарынан ааттаннылар.
Маннык улахан ситиһии, кырачаан уһуйаан иитиллээччилэрэ бэйэлэрин сатабылларын, кыахтарын Москуба куоракка ыытыллыахтаах улахан форумҥа киэҥ ааны арыйда, онно кинилэр дошкольнай үөрэхтээһиҥҥэ эрэгийиэн бастыҥнарын кытары илин-кэлин түсүһүөхтэрэ. Кинилэр үлэлэригэр экспертэр үлэҕэ-хамнаска төрүт үгэһи тутуһууларын, быраактыкаларын суолтатын итиэннэ көрдөрүккэ туруоруллубут методическай үлэлэрин таһымын үрдүктүк сыаналаатылар.
Быыстапка кыттыылаахтарын уонна эксперт чилиэттэрин сэбиэтин сүрүн болҕомтотун бэйэ айыллан таһаарыллыбыт ааптарыскай оонньуулар итиэннэ “Ой-Ай-Дай” төрүт үгэһи харыстаан инникигэ хардыы” патриотическай иитиигэ туһаайыллыбыт үлэ ылла. Быһата диэн эттэххэ манна оҕолор оонньуу көмөтүнэн бэйэлэрин норуоттарын төрүт үгэстэрин, саҥарар саҥаларыгар туох даҕаны харгыһа суох уһуйуллан тахсаллар.
“Бу барыта биһиги уһуйааммыт кэлэктиибин бүттүүнүн үлэтэ, элбэх сыра-сылба барда. Өр сыллаах үлэбит үтүө түмүктээх буолбутугар бука барыгытыгар дириҥ махталбын биллэрэбин”, — диэн уһуйаан сэбиэдиссэйэ, РФ үөрэхтээһинин туйгуна Альбина Варламова санаатын үллэһиннэ.
Санатан эттэххэ өрөспүүбүлүкэ үрдүнэн 315 уһуйаан сахалыы тылынан үлэлиир, итини сэргэ нуучча тылын уонна эбии омук тылын үөрэтэллэр. Ол иһигэр 499 уһуйаан оҕону сахалыы үөрэтэр, 292 — нууччалыы, 7 — эбээннии.
Сэмэн ЖЕНДРИНСКЭЙ. Хаартыска уһуйаан тус архыыбыттан