Икки күн устата о.э. балаҕан ыйын 6-7 күннэригэр, Үөһээ Бүлүү улууһун Нам нэһилиэгэр VIII-с төгүлүн “Тобуруокап көмүс күһүнэ” хоһоон көҥүл түһүлгэтэ Саха норуодунай бэйиэтэ, буойун-учуутал, элбэх ырыа ааптара Бүөтүр Ньукулаайабыс Тобуруокап уһаайбатыгар ыытылынна.
Бу түһүлгэҕэ икки күн устата өрөспүүбүлүкэ араас муннуктарыттан айар куттаахтар түмсэннэр хомоҕой хоһооннорун ааҕан, сынньанан, күөн күрэхтэһэн ыалдьыттаатылар.
Быйылгы тэрээһиҥҥэ өрөспүүбүлүкэ араас муннуктарыттан, уопсайа 13 улуустан уонна Дьокуускай куораттан 150-ча киһи ол иһигэр 70-тан тахса суруйааччы хоһоонньуттар муһуннулар ону таһынан “Дани-Алмас” кинигэ кыһатын күрэҕэр араас улуустан уопсайа 12 үлэ киирбит.
Дьокуускай куораттан ыҥырыылаах ыалдьыттар: Саха норуодунай суруйааччылара Наталья Михалева — Сайа уонна Дмитрий Наумов, тыл билимин дуоктара, литэрэтииринэй кириитик Варвара Окорокова хоһоонньуттары эҕэрдэлээтилэр.
Ону тэҥэ Үөһээ Бүлүү улууһун дьаһалтатын аатыттан улуус баҺылыгын социальнай хайысхаҕа уонна дьиэ кэргэн бэлиитикэтигэр солбуйааччы Анна Уларова бэйэтэ айбыт суруйуутунан “Тобуруокап көмүс күһүнэ” хоһоон түһүлгэтин кыттыылаахтарын эҕэрдэлээтэ. Бары кыттааччылары, мустубут ыалдьыттары ытык Хомустаах сиригэр-уотугар нөрүөн-нөргүй тылынан “Нам нэһилиэгэ” МТ баҺылыга Александр Кардашевскай көрүстэ.
Киэһэтин Бүлүү эбэ биэрэгэр Сэмэнээс Даркылааҕын алааһыгар сыа балыкка муҥха, айылҕаҕа сынньалаҥ киэһэтэ тэрилиннэ. Бүгүн, балаҕан ыйын 7-с күнүгэр “Түөрт строка” хоһоон айыытыгар уонна хоһуйсууга күрэх тэрилиннэ, түмүктэри таһаардылар.
Биһиги Чурапчыбыт улууһуттан СӨ суруйааччыларын Сойууһун чилиэнэ, “Чурапчы” литэрэтииринэй түмсүү бэрэссэдээтэлэ, СӨ култууратын туйгуна Римма Иннокентьевна Корякина-ХОТУУНА төрөппүт кыыһынаан, аныгы саха литэрэтиирэтигэр эмиэ бэрт ситиһиилээхтик суруйа-бичийэ сылдьар, норуокка сөбүлэппит “Күтүөккэ хомолто” сэһэн ааптара САРДААНАЛЫЫН тиийэннэр Чурапчы аатын ааттатылар.
Ол курдук Римма Иннокентьевна бэрт эрийсиилээх түһүмэхтэр кэннилэриттэн бочуоттаах үһүс миэстэҕэ тигистэ, киниэхэ “Дани-Алмас” кинигэ кыһатыгар 50 кинигэни босхо бэчээттэтэн таһаарарыгар туоһу сурук туттарылынна итини таһынан “Чурапчы” литэрэтииринэй түмсүү бэйэлэрин хомуурунньуктарын “Офсет” издательствоҕа бэчээттэтэллэригэр 20% чэпчэтии көрүллэр сэртэпикээтин бэлэх ууннулар. Манна муҥутуур кыайыылааҕынан Ньурба оройуонуттан Саргылаана Стручкова оттон иккис миэстэ Үөһээ Бүлүүлэр бэйэлэрин суруйааччылара Антонина Хобусарова буолла.
“Олохтоох дьаһалта олус бэрт тэрээһини тэрийдэ, дьон-сэргэ улаханнык астынна. Халлааммыт төһө даҕаны тымныытын иһин, уруккуттан билсэр дьон мустубут буоламмыт үөрүү бырааһынньыга буолла. Ас-үөл барыта босхо, олохтоох оскуола ыспартыыбынай саалатыгар хоннубут, Элбэх хоһоон ааҕылынна, үгүс ырыа ылланна. Киэһэтин Бүлүү эбэ кытылыгар эмиэ туспа бырааһынньык тэрилиннэ, биир тылынан эттэххэ олус үчүгэй. Алаадьы, сүөгэй, барыанньа арааһа, собо, кус миинэ, мунду, сыа балык барыта баар, барыта буор босхо. Үөһээ Бүлүүлэр үтүөкэннээх да дьон эбиттэр! Аны туран кинигэ атыытын, быыстапкалары “Дани-Алмастар” тэрийдилэр. Эрдэ эппитим курдук олохтоохтор олус үчүгэйдик көрүстүлэр, Нам нэһилиэгин“Дьиэрэй” ырыа ансаамбыла, Үөдүгэй нэһилиэгин дьахталларын түмсүүтэ эҕэрдэлээтилэр. Төһө да тымныытын иһин, истиҥ-сылаас тыыннаах көрсүһүүлэр, айар куттаах дьоҥҥо чахчы үөрүүлээх бырааһынньык буолла.
Бэйиэт Бүөтүр Тобуруокап туһунан, кини мусуойун көрдөрө-көрдөрө, кини күтүөтэ, Саха норуодунай суруйааччыта Дмитрий Наумов олус үчүгэйдик сэһэргээтэ.
Манна биһигини кытта 2022 сыллааҕы “Тобуруокап көмүс күһүнүн” кыайыылааҕа Полина Победа сылдьыста,
эдэр литератордар түмсүүлэрин салайааччыта Николай Васильев-Харыйалаах Уола кытынна”, — диэн Римма Иннокентьевна быыс булан төлөпүөнүнэн сэһэргээтэ.
Инньэ гынан, 2019 сыллаахха VI-с төгүлүн ыытыллыбыт «Тобуруокап көмүс күһүнэ» куонкурус кыайыылааҕа, суруйааччы-булчут-балыксыт Римма Корякина-ХОТУУНА бу да сырыыга дойдутун дьонугар өттүк харалаах, илии тутуурдаах кэлэн иһэриттэн олуһун диэн үөрэбит. Кыыһа САРДААНА бу сырыыга кыттыбата, кини көрөөччү быһыытынан тиийэн эдэр литератордар түмсүүлэригэр көх-нэм буолла, куонкурус хаамыытын кыраҕатык кэтээн көрдө.
Сэмэн Жендринскэй