Бүгүн о.э. ыам ыйын 26 күнүгэр Дьокуускай куоракка Арассыыйаҕа Аҕа дойдуну көмүскээччи, Саха Өрөспүүбүлүкэтигэр Ийэ дойдуну көмүскээччи, Улуу Кыайыы 80, Саха суругунан литературата төрүттэммитэ 125 сылларын чэрчитинэн, «Лунный блик и мой рассвет» диэн Эдэр литератордар сүбэлэрин чилиэнэ, анал байыаннай дьайыы кыттыылааҕа, бэйиэт Василий Рожин сырдык кэриэһигэр аналлаах кэтэхтэн уус-уран хоһоону ааҕыы күрэһэ түмүктэннэ.
Манна 35-гэр диэри саастаах эдэр ыччаттарга, Чурапчытааҕы Судаарыстыбаннай физическай култуура уонна успуорт үнүстүүтүн 1-кы кууруһун устудьуона Айаал Оконешников-Аан Айаал “Герой убит” диэн анал байыаннай дьайыы кыттыылаахтарыгар анаммыт суруйуутунан үһүс бочуоттаах миэстэни ылары ситистэ. Бу эдэр уолга улахан ситиһии буолар!
Герой убит – сердце тлен,
Прахом стал его огонь,
Тенью бродит в мире этом,
Но не слышит больше: “Внемли!”
Клинок ржавый в землю воткнут,
Ветер стонет сквозь броню.
Тот, кто пал, не встанет снова,
Только эхо: “Было…было…”
Кровь – чернила для стихов,
Память – холодный гранит.
Вечность шепчет: “Нет покоя”,
Герой мертв – мир не хранит.
Күрэс анал байыаннай дьайыы кыттыылааҕа Василий Рожин айымньыларыттан хоһооннору дорҕоонноохтук ааҕыыга ананна. Күрэһи Саха сирин суруйааччыларын сойууһун иһинэн үлэлиир Эдэр литератордар сүбэлэрэ тэрийдэ.
ЫСПЫРААПКА Василий Алексеевич Рожин (26.06.1990-13.11.2022) Үөһээ Дьааҥы оройуонун Элгэс нэһилиэгэр төрөөбүтэ. 2016 сылтан саҕалаан хоһооннорун икки тылынан суруйан саҕалаабыта. Кини хоһоонноро элбэх өрөспүүбүлүкэ хаһыаттарыгар, “Чолбон” литэрэтииринэй сурунаалга бэчээттэммиттэр. «Лунный блик» диэн кылгас хоһооннорун хомуурунньугун бэчээттээн таһааттарбыта XXI-с өрөспүүбүлүкэтээҕи эдэр суруйааччылар мунньахтарын кыттыылааҕа уонна XXIII-с төгүлүн ыытыллыбыт мунньахха “Поэзия” секциятын муҥутуур кыайыылааҕа. Анал байыаннай дьайыыга бэйэтин баҕа өттүнэн тылланан барбыта, эдэр суруйааччы кыргыһыы толоонугар хорсуннук охтубута.
Билиҥҥи сайдыылаах олоххо, баара-суоҕа 18 сааһыгар бэйэтэ суруйбут нууччалыы уонна сахалыы хоһооннорун хаама сылдьан ааҕар ону ааһан успуордунан утумнаахтык дьарыктанан, иллэҥ кэмигэр хара графит харандааһынан уруһуйдуур, маһы кыһан саахымат фигураларын оҥорор итиэннэ сыбаарканан үлүһүйэр эдэр киһи чугас эҥэр суоҕа буолуо. Кини – Айаал Оконешников диэн.
Дэлэҕэ даҕаны улууспут өрөгөйүн ырыатыгар “Ойуун, артыыс, суруйааччы үөскүүр сирэ баар — Чурапчы” диэн мээнэҕэ ылламмат. Айаал төрөөбүт түөлбэтэ — Чурапчы буолар, Арина Андриановна уонна Владимир Васильевич Оконешниковтар диэн элбэх оҕолоох дьиэ кэргэҥҥэ күн сирин көрбүтэ. Былырыын эрэ Улуу тириэньэр Дмитрий Коркин аатынан Өрөспүүбүлүкэтээҕи олимпийскэй эрэллэри бэлэмниир Чурапчытааҕы орто интэринээт-оскуоланы ситиһиилээхтик үөрэнэн бүтэрээт, ыраата барбакка билигин Чурапчытааҕы Судаарыстыбаннай физкултуура уонна успуорт үнүстүүтүн физкултуураҕа салаатын 1-кы кууруһун үөрэнэн түмүктээн эрэр. Иккис разрядтаах дуобаччыт. Эдэр суруйааччыга ситиһиилэри баҕарыаҕыҥ!
Сэмэн ЖЕНДРИНСКЭЙ