Сылын аайы атырдьах ыйын иккис субуотатыгар Арассыыйаҕа Физкультурник күнэ бэлиэтэнэр. Бу күн ССРС норуодунай хамыһаардарын Сэбиэтинэн 1939 сыллаахха олохтоммут.
Успуордунан сөбүлээн дьарыктанар дьону-сэргэни Чурапчы улууһун дьаһалтатын успуорка салаатын начаалынньыга Дьулустан Васильевич Егоров эҕэрдэлиир.
— Убаастабыллаах ыспарсымыаннар, тириэньэрдэр, успуорт бэтэрээннэрэ, успуордунан сөбүлээн дьарыктанааччылар! Успуорт салалтататын, уопсастыбаннаһын уонна тус бэйэм ааппыттан Физкультурник күнүнэн итиитик-истиҥник эҕэрдэлиибин!
Бу бырааһынньык сылын аайы успуорду сөбүлүүр дьону-сэргэни сааһынан, үлэлиир идэлэринэн араарбакка сомоҕолуур. Сылын ахсын олохторугар успуорду өрө тутар дьон элбээн иһэллэрэ хас биирдиибитин үөрдэр. Саха сиригэр маассабай успуорт балысханнык сайдар, дьон-сэргэ онно көхтөөхтүк кыттыһарын успуорка интэриэс күүһүрбүтүн туоһулуур. Бэйэ кыаҕынан үрдүк ситиһиилэр кэлэллэр!
Быйылгы дьыл биһиэхэ успуорт хайысхатыгар үгүс ситиһиилэри аҕалла, ол курдук Николай Тарскай бирииһигэр биһиги бөҕөстөрбүт үһүс сылларын субуруччу кыайыыны аҕаллылар, Ытык Күөлгэ ыытыллыбыт “Манчаары оонньууларыгар” биһиги хамаандабыт бэйэтин бөлөҕөр чөмпүйүөн үрдүк ылары ситистэ. Ити элбэҕи этэр. Бу сыллар тухары ыспарсымыаннар, тириэньэрдэр, успуордунан сөбүлээн дьарыктанааччылар кыахтарын ыһыктыбат туһуттан саҥаттан саҥа суолу тобулан күүскэ үлэлииллэр.
Бүгүҥҥү бырааһынньыкка сөп түбэһиннэрэн, эһиэхэ барыгытыгар кытаанах доруобуйаны, дьолу, үрдүк ситиһиилэри, саҥа кыайыылары баҕарабын!
Сэмэн ЖЕНДРИНСКЭЙ