Е.А.Борисов аатынан Чурапчытааҕы бибилэтиэкэ-архыыпка РСФСР уонна Саха АССР норуодунай артыыһа П.М. Решетников аатынан Чурапчытааҕы норуодунай тыйаатыр 55 сылыгар аналлаах «Умнуллубат уобарастар» диэн истиҥ-иһирэх ахтыы киэһэтэ буолла.
Бу көрсүһүүгэ режиссер Надежда Заболоцкая, Иван Бушков уонна кэскиллээх эдэр режиссер Василий Николаев тыйаатыр үлэтин сырдаттылар. Чурапчы нэоруодунай тыйаатыр бастакы көлүөнэ артыыстарын туһунан оҕолоро, аймах билэ дьоно, бииргэ алтыспыт, үлэлээбит доҕотторо ахтан-санаан аастылар. Тэрээһиҥҥэ тыйаатыр кэнники артыыстара Николай Хоютанов, Алексай Слепцов, Гурий Монастырев, Клара Кондратьева, Клара Кузьмина кыттыыны ыллылар.
Надежда Заболоцкая, ССРС култууратын туйгуна:
— Чурапчытааҕы норуодунай тыйаатыр бастакы быыһын аһаспыт артыыстар тустарынан олус үчүгэй ахтыы киэһэтэ буолан ааста. Кэлбит дьон-сэргэ истиҥ-иһирэх, бэһиэлэй, умнуллубат түгэннэри ахтан-санаан, күнүс 2 чаастан саҕалаан киэһэ 6 чааска диэри бириэмэ ааспытын билбэккэ да хааллым. Тыйаатыр бастакы быыһын 1969 сыллаахха Суорун Омоллоон «Төлөн Ньукуус» диэн драматынан аспыта. Саха сирин норуодунай суруйааччыта Суорун Омоллоон бэйэтэ кэлэн көрөн, кэпсэтэн, артыыстары кытта сүбэлэһэн, олус үчүгэй испэктээк тахсыбыта. Бу туруоруу көрөөччү дьүүлүгэр 60 төгүл тахсыбытын туһунан кэпсииллэр. Бастакы артыыстартан саамай ахтар артыыстарынан Төлөн Ньукуус оруолун толорбут Никита Корякин уонна Рокитин диэн Белин тойонун оонньообут Прокопий Дорофеев уонна биһиги бары таптыыр эдьиийбит Матрена Васильева буолаллар. Ону сэргэ истиҥник саныыр, талааннаах артыыһынан сыаналыыр киһилэрин Мария Седалищеваны, элбэх юмордаах киһи быһыытынан билинэр Егор Монастыревы уо.д.а биирдиилээн дьону ахтан- санаан аастылар. Маны таһынан тыйаатыр хаама сылдьар энциклопедиятын Иван Дегтяров уонна артыыс, суруйааччы, тылбаасчыт, фотограф Петр Попов тустарынан истиҥник аҕыннылар. Ити курдук, тыйаатырбыт 55 сылынан бастакы тэрээһиммит олус үчүгэйдик түмүктэммитинэн бэлиэтиибит. Бу ахтыы киэһэтин тэрийбит бибилэтиэкэ кэлэктиибигэр, чуолаан Матрена Захароваҕа махталбытын тиэрдэбит.
Норуодунай тыйаатыр суруйааччы Суорун Омоллоон «Төлөнтөн сириэдийэн тахсыбыт театр уота үйэттэн үйэҕэ куруук күндү көрөөччүлэрин ыҥыра, угуйа турдун» диэн эппит этиитин өрө тутан, 55 сыл устата уҕараан көрбөккө, күн бүгүн өрөспүүбүлүкэҕэ бастыҥ тыйаатыр быһыытынан үлэлии турарыттан режиссердарга, худуоһунньуктарга, артыыстарга урукку көлүөнэ артыыстара махтанабыт, сүгүрүйэбит. Инникитин да РСФСР уонна Саха АССР норуодунай артыыһа П.М. Решетников аатын үрдүк тута сылдьалларыгар баҕарабыт.
Ирина Петрова, Чурапчы нэһилиэгин Бочуоттаах олохтооҕо:
— Олус үчүгэй, истиҥ-иһирэх ахтыы күнэ буолла. Манна сылдьан уйадыйдым. Билигин биһиги ортобутугар суох айылҕаттан талааннаах дьон үлэлэриттэн, дьиэлэриттэн-уоттарыттан, оҕолоруттан быыс булан, тыйаатырга хайдах курдук бэриниилээхтик сылдьыбыттарын, чаҕылхай оруоллары толорбуттарын туһунан чугас, билэр дьонноро ис сүрэхтэн тахсыбыт иһирэх тылынан аҕыннылар, кэриэстээтилэр. Бу тэрээһини астынным, тэрийээччилэргэ уонна Надежда Заболоцкаяҕа, Иван Бушковка уонна Мария Герасимоваҕа махталбын тиэрдэбин.
Марфа Петрова.