Саха киһитэ эрэ барыта көрбүтүн интэриэһиргиир, бэйэтэ тиийэн кэпсэттэҕинэ-ипсэттэҕинэ, тутан-хабан көрдөҕүнэ биирдэ эрэ табыллар курдук кэмнэрэ баар буолаллар. Ол сиэринэн бүгүн Маҕаайы таһынааҕы тохтобулга дьикти оҥоһулаах тиэхэньикэлэр тохтоон туралларын көрөммүт, “Саҥа олох” эрэдээксийэтэ тиийэн кимнээҕин-туохтарын, ханна айаннаан иһэллэрин туоһуластыбыт.
Хата биһиги дьолбутугар, Михаил диэн 40 сыл стажтаах кырдьаҕас нуучча суоппара, өрдөөҕүттэн билэр доҕорун көрсүбүт курдук үөрэ-көтө көрүстэ уонна туох даҕаны ыарааһына-чэпчээһинэ суох хайдах баарынан сэһэргээтэ: “Бу эн көрөр үрдүк кыамталаах тиэхэньикэлэрин 2025 сыл бүтүүтэ оҥоһуллан бу соторутааҕыта Дьокуускайга кэлбиттэрэ уонна бу бүгүн Чурапчыга таарыйан Чукоткалаан иһэбит. Биһигини “Чукотснаб” аахсыйалаах хампаанньа хааччыйан уһун айаҥҥа анаата.
Оттон бу көрөр “Профи-Макс-Тягач” диэн тиэхэньикэлэр “Север Тракс” диэн вездехоттары оҥорор хампаанньа оҥоһуллан икки атахтаах кыайан сылдьыбат итиэннэ тоһуттар тымныыга, уот куйааска диэн анаммыт тимир көлөлөр буолаллар, сыаналара 18 мөл.тахса суумма. Мантан салгыы айаннаатахпытына көстөн иһиэ, билигин туох даҕаны диир кыаҕым суох, мотуора 4,5 лиитэрэ, механика, дизель. Билигин кыратык сынньана түһэн бараммыт салгыы айаммытын тутуохпут ”.
Итини таһынан кырдьаҕас суоппар, Чурапчылар маладьыастарын, кыбыстан-толлон турбакка кэлэннэр кэпсэтэллэрин, көмөлөһөллөрүн тоһоҕолоон бэлиэтээтэ.
Сэмэн ЖЕНДРИНСКЭЙ. Ааптар хаартыскаҕа түһэриитэ