Чурапчылар сыл ахсын буоларын курдук Улуу Кыайыы күнүн киэҥ далааһыннаахтык бэлиэтииллэр. Ол курдук, 1000 үөрэнээччи хора, “Боотур Уус” стадиоҥҥа улахан параат бүтүн өрөспүүбүлүкэҕэ киэҥник биллэр.
Быйыл Улуу Кыайыы үбүлүөйдээх 80 сылын бу таһымы ыһыктыбакка, өссө кэҥэтэн, киэргэтэн көрүстүлэр. Бэҕэһээ киин болуоссакка Кыайыы Знамятын өрө көтөхтүлэр, 80 сүүрүк 80 км сүүрдүлэр, 1000 үөрэнээччи Кыайыы ырыатын ыллаатылар, быыстапка турда, “Кыайыы эшелона” агитбиригээдэ түөлбэлэринэн кэрийэ сылдьан кэнсиэрдээтэ уонна киэһэ “Кыайыы чүмэчитэ” акция, “Сырдык сарсыҥҥы туһугар” испэктээкил ыытылынна.
Быйыл парааттааччылар Кыайыы мемориалыттан “Боотур Уус” стадиоҥҥа хааман тиийдилэр. Парааты майор, сэбиэскэй-партийнай үлэ бэтэрээнэ Семен Никитин салайда. Чурапчы нэһилиэгин бары оскуолаларыттан 1935 үөрэнээччи мустан, хорунан ыллаабыттара киһини эрэ барытын долгутта, киэн туттууну үөскэттэ.
Улуус баһылыга Степан Саргыдаев олохтоохтору, сэрии кэмин оҕолорун, огдооболорун, Көһөрүллүү кыттыылаахтарын,тыыл бэтэрээннэрин, бойобуой дьайыы бэтэрээннэрин уонна байыаннай дьайыы кыттыылаахтарын Улуу Кыайыы күнүнэн эҕэрдэлээтэ. Кинини сэргэ улуус дьокутааттарын Сэбиэтин бэрэссэдээтэлэ Яков Оконешников, Чурапчы нэһилиэгин баһылыга Владимир Сивцев, Саха сирин Ытык Сүбэтин бэрэссэдээтэлин солбуйааччыта Иннокентий Аммосов, Хоту Көһөрүллүү кыттыылааҕа Роман Михайлов тыл эттилэр.
Байыаннай дьайыыга хорсуннук охтубут биир дойдулаахтарбытыгар наҕараадалар туттарылыннылар. Ол курдук «Эр санааланыы» уордьанынан Филипп Афанасьев, «Георгиев кириэһэ» 4-с истиэпэнинэн Виталий Захаров, «Хорсун быһыытын иһин» Альберт Герасимов наҕараадаланнылар.
«Чурапчы улууһун Бочуоттаах олохтооҕо» ааты сэрии огдооботугар, тыыл бэтэрээнигэр Александра Софроноваҕа, тыыл бэтэрээнигэр Марфа Никитинаҕа иҥэрдилэр.
Артиллерист Г.Д. Протодьяконов аатынан түөскэ анньыллар бэлиэни Василий Монастырев, Николай Мордускин, Петр Ноговицын, Петр Сивцев уонна Иннокентий Федоров туттулар.
Миитин кэнниттэн улуустааҕы байыаннай-патриотическай кулууп иитиллээччилэрэ туруорууларын көрдөрдүлэр, 80 үҥкүүһүт Кыайыы вальсын үҥкүүлээтилэр.
Салгыы нэһилиэк тэрилтэлэрин икки ардыларынааҕы эстафета, киин болуоссакка норуот күүлэйэ, Кыайыы оһуохайа, киэһэ “Кыайыыга кынаттаабыт ырыалар” киинэ-кэнсиэр уонна Кыайыы салюта буолуохтара.
Елена Макаринская
Видео Наталья Сибирякова