Ахсынньы 4-5 күннэригэр Дьокуускайга регионнар икки ардыларынааҕы олоҥхо фестивала уонна научнай-практическай форум ыытылла турар.
“Олоҥхону сайыннарыы уонна үйэтитии” диэн ааттаммыт форумҥа Чурапчыттан Олоҥхо киинин салайааччыта Дмитрий Попов, исписэлиис Оксана Монастырева, Чакыртан фольклор дьиэтин үлэһиттэрэ баһылыктара Константин Лебедевтиин уонна Мария Филиппова кыттыыны ыла сылдьаллар.
“Форумҥа араас дойдуттан кэлэн, бэйэлэрин эпостарын билиһиннэрдилэр. Маны таһынан таһымнаах лектордар, учуонайдар кэпсээтилэр. Форум 4 секциянан ыытылынна. Мин “Эпос и традиции” секцияҕа “Чурапчы улууһун олоҥхоһуттара” диэн темабынан кытынным. Бу секцияҕа Саха сириттэн Агафья Захарова, Василий Илларионов курдук улахан учуонайдар дириҥ ис хоһоонноох дакылааттары аахтылар. СӨ култуура миниистирэ Афанасий Ноев кыттыыны ылла. Манна киирбит этиилэр ырытыллан, түмүллэн СӨ Бырабыыталыстыбатын бэрэссэдээтэлин солбуйааччытыгар Сергей Местниковка бэриллиэхтэрэ. Маны таһынан бүгүн “Фольклорист оскуолата” төгүрүк остуолга кыттабын. Онно Семен Новгородов төрөөбүт алааһыгар Чуораайыттаҕа литературнай оскуола бырайыагын билиһиннэриэм”, — диэн Дмитрий Попов кэпсээтэ.
Елена Макаринская