Байыаннай дьайыы саҕаланыаҕыттан Чурапчы улууһун олохтоохторо кыайыы туһугар туруулаһа сылдьар уолаттарыгар көмөлөрүн тиһиктээхтик ыыталлар. Манна сүрүннээччинэн, иилээччинэн — саҕалааччынан Чурапчы улууһун дьаһалтата буолар. Бу күннэргэ байыаннай дьайыы буола турар сиригэр Чурапчы улууһун дэлэгээссийэтэ тиийэн, уолаттары көрсөн, гуманитарнай көмөнү туттаран кэллэ. Чурапчы улууһун баһылыгын бастакы солбуйааччы Рустам Данилов, улуус баһылыгын солбуйааччы Алексей Лобанов, Хоптоҕо нэһилиэгин баһылыга Леонид Бурцев састааптаах дэлэгээссийэ уон күн устата баран үлэлээтэ.
“Уолаттарбытыгар уопсайа 1 туонна 600 киилэ гуманитарнай көмө тиксэрдибит. Донецкай, Луканскай норуодунай өрөспүүбүлүкэнэн, Запорожьенан, Белгородынан сылдьан, 44 буойуну көрүстүлэр. Уолаттар санаалара бөҕөх, настырыанньалара бойобуой. “Кэлэргитин олус кэтэспиппит, дойдубут дьонугар истиҥ махталбытын тиэрдэбит”, — диэн махтаналлар. Ол курдук, “Фермер” уаз массыынаны, матасыыкыллары, кыһын кэлэн иһэринэн, оһохтору, генератордары, таҥаһы-сабы, быһахтары, сибиэһэй ынахпыт, убаһабыт этин, ыһаарыламмыт собобутун, сир аһын, уолаттарга дьоннорун баһыылкаларын тиэртибит. Онон туруоруллубут уопсай былаан туолла. Салгыы даҕаны анал байыаннай дьайыыга сылдьар биир дойдулаахтарбытыгар анаммыт көмөбүтүн күүһүрдэн иһиэхпит, «Чурапчы сайдыыта» пуонда үлэтин уҕарыппат”, — диэн Чурапчы улууһун баһылыга Степан Саргыдаев үллэстэр.
Людмила Горохова.