Муус устар 26-27 күннэригэр, Дьокуускайга туризм сайдыытын агентствота тэрийиитинэн, «Якутия—место встречи» диэн туризм уонна креативнай индустрия улахан өрөспүүбүлүкэтээҕи форума ыытылынна. Манна бүтүн Саха сириттэн туроператордар, туризм эйгэтигэр сыһыаннаах урбаанньыттар уо.д.а. кыттыыны ыллылар. Олор истэригэр Чурапчыттан «Алаас амтана» түмсүү кытынна. Икки күн устата кыттааччылар «Кружало» киэҥ уораҕайыгар быыстапкаларын тардан турдулар. Бастакы күн быыстапканы тэҥэ урбаанньыттар үрдүк сыанаттан бэйэлэрин бородууксуйаларын, маршруттарын билиһиннэрэн кэпсээтилэр, оттон иккис күн «Патриот» эдэр ыччат киинигэр спич-сиэссийэлэр ыытылыннылар. Манна чурапчылар иккис треккэ «Алаас амтана» диэн бырайыактарын сырдаттылар. Бэлиэтээн эттэххэ, аҥаардас урбаанньыттар эрэ буолбакка, былаас бэрэстэбиитэллэрэ, муниципалитеттар бэйэлэрин өттүттэн эмиэ туох өйөбүл баар буолуон сөбүн, улуустарын бэлиэ сирдэрин, уратыларын кэпсээн, барыта үс трек ааспыта.
Муниципалитет өттүттэн эмиэ Чурапчы улууһа туризм сайдыытыгар бэйэтин көрүүлэрин үллэһиннэ. Холобур, алаастарынан оттоон-мастаан, тыа хаһаайыстыбатынан дьарыгыран олорор, тыа хаһаайыстыбатын бородууксуйатын оҥорон таһаарыыга инники күөҥҥэ сылдьар улуус туризм эйгэтигэр экотуризм, агротуризм хайысхатын тутуһуохтарын сөп, гастрономическай бренд буолар кыахтаах диэн ис хоһоонноох сырдатыыны улуус аатыттан олохтоох көҕүлээһини өйүүр агентство исписэлииһэ Саргылана Старостина оҥордо. Манна туризмы сайыннарарга биһиги «Халыма» федеральнай айан суолун кытыытыгар олорорбут улахан олук буолар. Билиҥҥи кэмҥэ атын сиртэн кэлбит туристар үксүлэрэ бу аартыгынан «Тымныы полюһун» көрө-истэ, Өймөкөөн улууһугар айанныыллар. Чурапчы—кинилэр аара сынньанан, амтаннаах саха аһынан үссэнэн ааһар сирдэрэ буолуон сөп. Ол иһин Ульяна Заровняева «Алаас амтана» бырайыага манна киирэн биэрэрэ оруобуна оното. Бу бырайыагы форумҥа эдэр урбанньыт Анастасия Сивцева билиһиннэрдэ. Айанньыттар аара тохтоон, Чурапчы туой буоруттан оҥоһуллубут иһиттэргэ Чурапчы этиттэн-аһыттан, бурдугуттан буһарыллыбыт минньигэс аһы амтаһыйар кэмнэригэр улууспут уратытын кэпсиэхтэрэ, билиһиннэриэхтэрэ, туристар баҕарар буоллахтарына, түмэллэрбитигэр, хаһаайыстыбалаах дьоҥҥо уо.д.а. сирдэргэ сырытыннарыахтара турдаҕа. Маннык курдук араас хайысхаларынан идиэйэлэрин билиһиннэрдилэр. Ол эбэтэр тастан кэлэр туристарга эрэ буолбакка, иһинээҕи дьоммутугар-сэргэбитигэр эмиэ сайаапканан төһө баҕарар сахалыы сандалылаах араас хабааннаах көрсүһүүлэри тэрийэргэ бэлэмнэр. Холобур, бу «Алаас амтана» диэн үс киһи—Татьяна Илларионова, Прокопий Екечьямов, Ульяна Заровняева айан таһаарбыт бырайыактарыттан сиэттэрэн, бүтүн улуус туризмын сайыннарар бырайыак төрөөн, улаатан, кэҥээн тахсыбыта кэрэхсэбиллээх. «Алаас амтана» 2025 сыл саҥатыттан күүскэ үлэлиэҕиттэн, 40-тан тахса тэрээһини ыытан, номнуо 13 000-тан тахса киһини хапта. «Еда как связь. Посуда как память. Трапеза как событие»—диэн бу бырайыак презентациятыгар да сурулла сылдьарын курдук, манна өбүгэбит үгэһэ, төрүт аспыт, туой иһиппит туһата, уруккулуу ньыманан буһарыы сатабыла барыта түмүллүбүт буолан, олус диэн ураты, биһиэхэ чугас, истиҥ эйгэлээх.
Форум түмүгүнэн 7 кыайыылаах номинацияны биллэрбиттэр. Чурапчыбыт «Лучший гастрономический бренд» диэн номинацияҕа кыайыылааҕынан таҕыста. Онон биир дойдулаахтарбытын бу үрдүк ситиһиилэринэн эҕэрдэлиибит уонна инникитин туризм сайдарыгар, баҕа санаалар олоххо киирэллэригэр баҕарабыт!
Наталья Сибирякова