Чурапчы нэһилиэгин биир ытык түөлбэтигэр – Интэринээт оскуола томторугар бүгүн биир дьоһун бэлиэ тэрээһин ыытылынна. Биллиилээх учуонай-агроном, кыраайы үөрэтээччи, фольклорист Василий Федотович Ермолаев төрөөбүтэ 95 сылыгар анаан, кини олорон ааспыт уонна кини аатын сүгэр уулуссаҕа ыйынньык бэлиэ үөрүүлээх быһыыга-майгыга арылынна.
Василий Федотович төрөөбүт улууһун сайыннарыыга, чуолаан тыа хаһаайыстыбатын салаатыгар – бурдугу үүннэриигэ, оҕуруот аһын олордууга, сири кытта үлэҕэ үгүс өрүттээх үлэни-хамнаһы ыыппыта, ону тэҥэ Чурапчы чулуу олоҥхоһуттарын аатын үйэтитиигэ дьоһун кылаатын киллэрбит биир тумус туттар ытык киһибит буолар. Кини хомуйан бэлэмнээбит матырыйаалларынан тахсыбыт кинигэ күн бүгүн билиҥҥи көлүөнэ олоҥхоһуттарга, олоҥхону сэргээччилэргэ, култуура, үөрэх эйгэтин үлэһиттэригэр тугунан да кэмнэммэт сүдү бэлэҕинэн сыаналанар.
Бэлиэ тэрээһиҥҥэ Василий Ермолаев кыыһа Акулина Колодезникова, чугас аймахтара, Саха норуотун суруйааччыта Сэмэн Тумат, Чурапчы улууһун уонна нэһилиэгин дьаһалтатын, тэрилтэлэрин туһааннаах салайааччылара, Сылаҥ нэһилиэгин баһылыга Егор Макаров, түөлбэ олохтоохторо, бииргэ алтыспыт дьон кытыннылар, учуонай-агроном, фольклорист олоҕун, үлэтин-хамнаһын туһунан сырдаттылар. Кыыһа Акулина Васильевна аҕатын үбүлүөйдээх сылыгар кини сырдык аатын үйэтитиигэ үлэлэспит биир дойдулаахтарыгар, улуус уонна нэһилиэк дьаһалтатыгар, Олоҥхо киинин салайааччытыгар Дмитрий Поповка, Валерий Герасимовка уо.д.а. истиҥ махталын тиэртэ.
“Улууспут сайдыытыгар тус суолларын-иистэрин хаалларбыт биллэр-көстөр дьоммут аатын үйэтитии – билиҥҥи көлүөнэ ытык иэспит. Биһиги улууспутугар үйэтитии хамыыһыйатын бэрэссэдээтэлинэн улуус Сэбиэтин бэрэссэдээтэлэ Яков Оконешников үлэлиир. Кини салалтатынан нэһилиэкпитигэр элбэх өрүттээх үлэ-хамнас ыытыллар. Быйыл үс чулуу дьоммут үбүлүөйдээх сылларынан маннык ыйынньык бэлиэни – А.А. Шадрин, А.С.Шадрин уонна В.Ф. Ермолаев ааттарыгар арыйдыбыт”, — диэн Чурапчы нэһилиэгин баһылыгын солбуйааччы Варвара Макарова сырдатта.
Манна сыһыаран эттэххэ, бэҕэһээ Сылаҥ нэһилиэгэр “Уруйдан олоҥхо, Сылаҥ ытык сиригэр!” IV-с улуустааҕы олоҥхо ыһыаҕа В.Ф. Ермолаев төрөөбүтэ 95 сылыгар ананан, бэрт тэрээһиннээхтик ыытылынна. Манна олоҥхону толорууга регионнааҕы таһымнаах куонкуруска 30-тан тахса олоҥхоһут аат ааттаан кэлэн кытынна.
Анна Захарова.