Ыhыах диэн Саха Саҥа дьылын күнэ уонна сайын, айылҕа тыллыытын бэлиэ күнэ. Ыһыах ыйа — бэс ыйа.
Биэлэри тутан, кымыс көөнньөрөллөр. Ыһыах туһүлгэтигэр ыраахтан, чугастан кэлбит ыалдьыттар уохтаах кымыһы иһэллэр, үтэһэлээх этинэн күндүлэнэллэр.
Илии-атах оонньуутугар күрэхтэһэллэр, оhуохай дьиэрэйэр, ырыа дэлэйэр. Ат сүүрдүүлэрэ ыытыллаллар.
Бу үтүө үгэс Чурапчы улууһугар ханан даҕаны умнулла илик. “ТОС-тар түһүлгэлээн олорор балаҕаннара олохтоохтору, ыалдьыттары көрсөргө бэлэм. Сарсын о.э бэс ыйын 21 күнүгэр күнүс 13 чаастан ТОС балаҕаннарын түһүлгэтигэр түөлбэ олохтоохторо төгүрүйэ олорон, улууспут тэриллибитэ 95, Улуу Кыайыы 80 сылларыгар анаммыт Үрүҥ Тунах Ыһыахха, улуус, нэһилиэк Аҕа баһылыктарын, ТОС-тар эҕэрдэлэрин, ырыа-тойук истиэхтэрэ. Түһүлгэҕэ кэлбит дьону ыһыахха анаан астаммыт эмис биэ этинэн күндүлүөхтэрэ. Күөххэ үктэммиччэ аймахтардыын алтыһан, ыалдьыттардыын сэлэһэн, тапталлаах Чурапчыбыт инникитин түстэһиэхпит”, — диэн “Чурапчы нэһилиэгэ” Тыа сирин түөлбэтин дьаһалтатын пресс-сулууспата куйаар ситимигэр иһитиннэрэр.
Сэмэн ЖЕНДРИНСКЭЙ