Бүгүн-сарсын Чурапчы улууһугар улахан успуорт бырааһынньыга! Александр Федотов аатынан успуорт уораҕайа “лыык” курдук дьонунан толору, таһырдьа тиэхэньикэлэр баппаккалар, Курашов уонна Ленин аатынан уулуссаларынан кэккэлэһэ турдулар.
Лоп курдук 17 сыл буолан баран, Чурапчы түһүлгэтэ өрөспүүбүлүкэҕэ хаһан даҕаны ыытыллыбатах улахан күрэҕи тэрийдэ, ол курдук 484 мадьыны, кинилэр истэригэр 2 успуорт үтүөлээх маастара, 5 норуоттар икки ардыларынааҕы успуорт маастардара итиэннэ 38 Арассыыйа успуордун маастара кэлэн, Гавриил Романович Десяткин-Күүстээх Дэһээккин кэриэһигэр ыытыллар күрэххэ кыраһыабай киирсиилэри көрдөрө сылдьаллар. Өрөспүүбүлүкэ бары олохтоохторо “Саха” НКИХ уонна “Мамонт” канаалларга хас биирдии киирсиини кыраҕатык кэтии олороллор.
Манны Абый, Аллайыаха, Амма, Анаабыр, Булуҥ, Үөһээ Бүлүү, Бүлүү, Горнай, Дьокуускай, Кэбээйи, Мэҥэ Хаҥалас, Мииринэй, Ленскэй, Нам, Ньурба, Орто Халыма, Өймөкөөн, Өлүөхүмэ, Өлөөн, Сунтаар, Таатта, Уус Алдан, Уус Майа, Хаҥалас, Эдьигээн, Эбээн Бытантай уонна Чурапчы улуустарыттан чулууттан чулуу, күүстээхтэн күүстээх ыспарсымыаннар сүүмэрдэнэн кэллилэр.
Тэрээһин үөрүүлээх чааһыгар СӨ физическэй култуураҕа уонна успуорка миниистирэ Леонид Спиридонов, “Чурапчы улууһа” МО баһылыга Степан Саргыдаев, мас тардыһыытыгар Бүтүн Арассыыйатааҕы бэдэрээссийэ Бэрэсидьиэнэ Михаил Гуляев, СӨ Манчаары Баһылай аатынан “Модун” саха төрүт көрүҥнэрин дириэктэрэ, СӨ Ил Түмэн дьокутаата Геннадий Васильев, СӨ Мас тардыһыы бэдэрээссийэтин Бэрэсидьиэнэ Анатолий Баишев, СӨ Мас тардыһыы бэдэрээссийэтин бастакы Вице-бэрэсидиьиэнэ Игорь Борисов, күрэхтэһии сүрүн судьуйата Иван Сивцев кыттыыны ыллылар.
Манна миниистир Леонид Николаевич, “СӨ төрүт оонньууларыгар кылаатын иһин” түөскэ анньылар бэлиэнэн Чурапчы улууһун баһылыга Степан Саргыдаевы наҕараадалаата.
Кинини сэргэ СӨ физическэй култуураҕа уонна успуорт министиэристибэтин махтал суруктарынан СӨ успуордун маастара Николай Быганов, СӨ успуордун маастара Григорий Барашков, Сахаада-успуорт успуордун маастара Илья Дыдаев, СӨ успуордун маастара Александр Сивцев туттулар.
Мас тадыһыыга СӨ успуордун маастарын нуорматын толорбутун туһунан дастыбырыанньаны Одьулуунтан төрүттээх Айсен Молуковка биэрдилэр.
“Чурапчы улууһугар үтүөлэрин 3-с истиэпэннээх” бэлиэнэн мас тардыһыытыгар СӨ успуордун маастардара Николай Барашков уонна Петр Саввин наҕаарадаланнылар. Оттон успуорт бэтэрээнэ Лука Поповка, улуус баһылыгыттан өйдөбүнньүк бэлиэлээх махтал сурук туттарылынна.
Бүтүн Арассыыйатааҕы мас тардыһыы бэдэрээссийэтин Бэрэсидьиэнин махтал суруктарын Игорь Борисов, Иван Готовцев, Василий Алексеев, Алексей Агапов, Станислав Иванов ыллылар.
Мас тардыһыы көрүҥүн Аан дойдуга таһаарыыга сүдү кылааттарын иһин бочуотунай грамоталарынан Павел Саввин, Анатолий Ефремов, Григорий Барашков наҕараадаланнылар.
Сахаада-успуорт маастарын аата Мэҥэ Хаҥалас улууһуттан Сергей Ноговицыҥҥа уонна Үөһээ Бүлүү улууһуттан Василий Санниковка иҥэрилиннэ.
Финальнай киирсиилэр саҕаланнылар, сарсын о.э. олунньу 9 күнүгэр өссө тыҥааһыннаах күрэх буолара күүтүллэр! “Саҥа олоҕу” кытары бииргэ буолуҥ!
Сэмэн ЖЕНДРИНСКЭЙ. Ааптар хаартыскаҕа түһэриитэ