С.К.Макаров аатынан Чурапчы гимназиятыгар бүтүн Арассыыйатааҕы «Бастыҥ учуутал-2026» куонкурус улуустааҕы сүүмэрдиир түһүмэҕэ буолла.
Бу куонкурус үөрэх эйгэтин үлэһиттэрин биир сүрүн, идэ сатабылын көрдөрөр куонкурустара буолар. Онон кыттааччылар биэс түһүмэҕинэн тус уопуттарын, сатабылларын толору көрдөрдүлэр. Ол курдук, аһаҕас уруоктары, маастар-кылаастары ыыттылар, педагогическай интервьюга хоруйдаатылар, ону сэргэ блиц, педагогический форсаж түһүмэхтэригэр билиилэрин тургуттулар, чиҥэттилэр.
Күрэх түмүгүнэн муҥутуур кыайыылааҕынан В.С. Соловьёв-Болот Боотур аатынан Хатылы орто оскуолатын история уонна обществознание учуутала Вероника Спиридонова ааттанан, Осиповтар педагогическай династияларын уонна Чурапчы улууһун профсойууһун анал бирииһинэн наҕараадаланна.
Бочуоттаах иккис миэстэни Одьулуун орто оскуолатын физика учуутала Руслан Бекянов уонна үһүс миэстэни С.К. Макаров аатынан Чурапчы гимназиятын информатикаҕа учуутала Игорь Сивцев ыллылар. Кинилэр Антипиннар уонна Ефимовтар педагогическай династияларын бириистэрин туттулар.
Вероника Спиридонова, кыайыылаах:
— Хатылы орто оскуолатыгар 2014 сылтан үлэлиибин. Оскуолам дириэктэригэр Екатерина Егороваҕа, администрациятыгар уонна көмөлөспүт бары хамыыһыйа чилиэннэригэр махталбын тиэрдэбин. Бу күрэххэ ый устата бэлэмнэннибит. Ол иһин кыайыыга эрэллээх буолан, долгуйбатым. Аһаҕас история уруогун гимназия 8-с кылаас үөрэнээччилэригэр ыыттым. Оҕолор уруокка көхтөөхтүк үлэлээтилэр.
Эдэр уопуттаах учууталга Вероника Ивановнаҕа улуус чиэһин өрөспүүбүлүкэтээҕи куонкуруска ситиһиилээхтик көмүскүүрүгэр баҕарабыт.
Марфа Петрова.