Чурапчы улууһун ыччатын десана»Айылгы» норуот айымньытын дьиэтигэр буолла. Эдэр ыччаты түмэр, волонтерскай хамсааһыны сайыннарар сыаллаах десант бары нэһилиэктэр ыччаттарын хапта. Ол курдук, улуус ыччатын дэлэгээссийэтэ эрдэттэн бэлэмнэнэн, ый устата былаанынан нэһилиэктэри кэрийэн үлэлээтэ.
Туһааннаах десант быйылгы түмүктүүр тэрээһинигэр, култуура уораҕайыгар Хатылы, Болтоҥо уонна Чурапчы нэһилиэгин көхтөөх ыччаттара муһуннулар. Ыччаттар бөлөҕүнэн арахсан хамаанданы түмэр, өйү тургутар биэс түһүмэхтээх квест оонньууну аастылар. Онтон десант сүрүн чааһыгар нэһилиэккэ ыччаты түмүүгэ туһуламмыт тэттик бырайыактары, идиэйэлэрин суруйан, көмүскээтилэр.
Бу күн саамай көхтөөх ыччаттарынан Чурапчы нэһилиэгин эдэр исписэлиистэрэ Елизавета Портягина уонна Ньургун Капитонов ааттаннылар. Кинилэргэ улуустааҕы ыччат дьыалатыгар сүрүн исписэлииһэ Алгыстаана Федорова өйдөбүнньүк бэлэхтэри туттарда.
Елизавета Портнягина, “Радость” оҕо дьоҕурун сайыннарар киин иһинэн үлэлиир “Өндөл” театральнай кружок салайааччыта:
— Үлэлиир тэрилтэм аатыттан кэлэн, бэрт сэргэх тэрээһиҥҥэкыттыыны ыллым. Ыччат десанын чэрчитинэн тэриллибит бөлөх улууспут бары нэһилиэктэрин кэрийэн, бүгүн бүтэһик, түмүктүүр тэрээһиннэрэ Чурапчы нэһилиэгэр буолбут эбит. Манна олус элбэх ыччаты кытта билистим, ону таһынан оҕо сылдьан алтыспыт дьоммун көрсөн, кэпсэтэн үөрдүм. Тэрийээччилэр бастаан билсиһиннэрии оонньуутун тэрийдилэр.Онтон хамаандаларга арааран, ыстаансыйаларынан оонньоттулар. Ол түмүгүнэн биһиги «Өндөл» хамаандабыт бастаата. Бүтэһигэр тыа сиригэр ыччаты хайдах түмэр туһунандебат кэпсэтии киэптээх таҕыста. Бары хамаандалар бырайыак суруйан, олус көхтөөхтүк кыттан көмүскээтибит. Улуус ыччатын түмсүүтүн сэңээрдим, саңа бырайыактары киллэриигэ үлэлэһиэхпин баҕардым.Бириэмэбин үчүгэйдик, туһалаахтык атаардым.
Ньургун Капитонов, И.И.Кандинскай аатынан «Айыллаан» култуура киинин звукооператора:
— Десаҥҥа арыый хойутаан кэллим. Хата сүрүн чааһыгар, бырайыак суруйуутугар куоттарбакка, толорусырыттым. Санаа атастаһыытыгар ыччат хамсааһынын тэрийиигэ, үлэлэтиигэ, эдэр дьону көҕүлээһиҥҥэ үчүгэй этиилэр киирдилэр дии саныыбын.Десант кыттааччылара үгүстэрэ үлэһиттэр эбит. Онон бэйэм саастыылаахтарым буолан, арыллан, дуоһуйа кэпсэттим. Чурапчы улууһун ыччатын улуус, нэһилиэк ыытар тэрээһиннэригэр көхтөөхтүк кыттыаҕын, бэйэбитин көрдөрүөҕүн уонна Чурапчы сайдарыгар туһугар үлэлиэҕин-хамсыаҕын! Бары үчүгэйи!
Ира Рожина, Болтоҥо нэһилиэгин ыччата:
— Олус үчүгэй тэрээһин буолла. Биллэн турар, билигин тыа сиригэр ыччаттар аҕыйахпыт. Онуоха ыччаты олохсутууга интэриэһинэй идиэйэлэри иһиттибит. Ону таһынан атын нэһилиэк ыччаттарын кытта билсэн, уопут атастаһан сэргэхсийдибит. Бөлөх тэриннибит,инникитин бииргэ үлэлииргэ эрэнэбит. Ыччаттар көхтөөх буолуоҕуҥ, сыл устата ыччакка аналлах олус элбэх тэрээһин ыытыллар эбит.
Марфа Петрова. Наталья Сибирякова видеота.