Бэҕэһээ өрөспүүбүлүкэ бары тыйаатырдарыгар кэтэһиилээх «Триумф» уус-уран киинэ көрдөрүүгэ тахсан, дьон киэҥ болҕомтотун тарта. Киинэ саха бөҕөстөрө Роман Дмитриев, Павел Пинигин уонна Александр Иванов Монреаллааҕы олимп чыпчаалын чаҕылхайдык ситиспиттэрин уонна кинилэр тренердарын Дмитрий Коркин туһунан сырдатар.
Бүгүн Чурапчыга бу киинэни устубут режиссер Михаил Лукачевскай, «Сахафильм» хампаанньа салайааччыта Алексей Егоров-Өркөн уонна ССРС, РСФСР, Саха АССР үтүөлээх тренера Дмитрий Коркин оруолун толорбут Иннокентий Луковцев, Олимпийскай чемпион Роман Дмитриев оруолун толорбут Семен Лукин кэлэннэр, спорт бэтэрээннэрин уонна киинэ уһуллуутугар үлэлэспит улуус олохтоохторун кытта көрүстүлэр, санаа атастастылар.
Киинэни ырытыһыыга спорду сэҥээрээччилэр, көҥүл тустуу сүгүрүйээччилэрэ тус санааларын тото-хана истиҥник үллэһиннилэр. Кинилэр киинэҕэ улуу тириэньэр дьарыктыыр ньымалара, тустууга киирсиилэр сытыытык, чуолкайдык көстүбүттэрин бэлиэтээтилэр итиэннэ Роман Дмитриев, Александр Иванов туохтан сылтаан кыһыл көмүскэ тиксибэтэхтэрин быһаарбыттарын биһирээтилэр. Көрөөччүлэр Сахаачча бу киинэҕэ аата ааттанан, үйэтитиллибититтэн үөрдүлэр.
Михаил Лукачевскай, режиссер, продюсер:
— Киинэбитин устубут историческай сирбитигэр кэлэн сүрэхтээтибит. Ол курдук, бэҕэһээ премьералаан баран, бүгүн Чурапчыга көрдөрдүбүт. Чурапчылар хайдах сыаналыыллара эбитэ буолла диэн олус долгуйбутум. Дьон сөбүлээбитин истэн дууһам уоскуйда.
Биһиги киинэбитигэр 1976 сыллаахха буолбут Монреаллааҕы өрөгөйү көрдөрдүбүт. Ол иһин болҕомтобутун үс олимпиецпытыгар уонна улуу тириэньэргэ уурдубут. Киинэбит көрөөччүлэри саҥа кыайыыларга көҕүлээн, улахан ситиһиилэргэ сирдииригэр баҕарабыт. Киинэни көрөн баран, успуордунан дьарыктана бардаххытына, ол аата биһиги кыайыыбыт түмүгэ (күлэр). Чурапчы дьонун-сэргэтин кэлиҥ, көрүҥ, дуоһуйа сынньаныҥ диэн ыҥырабыт.
Герасим Платонов, успуорт бэтэрээнэ:
-Бу киинэ эдэр сааспыт сырыыларын санатан, кыттыгастаах курдук сананным. Спортивнай интэринээт-оскуолаҕа нулевой кылаастан ахсыс кылааска диэри үөрэммитим. Биэс сыл Дмитрий Петровиһы, тоҕус сыл Констанин Сергеевиһы кытта алтыһан, интэринээт-оскуоланы бүтэрбитим. Роман Дмитриев, Александр Иванов, Павел Пинигин биһиги харахпыт ортотугар дьарыктаммыт уолаттар буолаллар. Онон киинэҕэ анаан-минээн кэлбитим. Дьон төһө умсулҕаннаахтык көрөрүн истээри, үчүгэйдик истибэт киһи, анал аппарааппын улаатыннаран көрдүм. Биир да киһи тыыммакка, биир да тыас иһиллибэккэ көрдүлэр. Арай артыыстар итэҕэтиилээхтик оонньоон, барыта аттыбытыгар буола турар курдук санаан, сотору буола-буола дьоннор өрө тыыналлара эрэ иһилиннэ. Онон бу киинэ табыллыбытын уонна инникилээҕин кэрэһэлиир.
Сардаана Гоголева, көрөөччү:
Киинэҕэ Константин Сергеевич Постников суруйуутунан киинэ көстөрүн биһирээтим. Урукку кэм уонна билиҥҥи кэм хатыһа сылдьар. Наар биир күргүөм буолбатах. Ол аата киинэ динамикалаах. Наар долгуйа олорбоккун, хантан эрэ күлэр-үөрэр кэмнэр кэлэллэр, онтон хомойор, күүрэр түгэннэр үөскүүллэр. Ол иһин көрөөччү быһыытынан киинэ олус табыллыбыт диэн сыаналаатым.
Варвара Орлова, эдэр ийэ:
— «Триумф» киинэни биир тыынынан көрдүм, астынным. Монреал тустуутугар сылдьыбыт курдук сананным, саха чулуу уолаттара туруоруммут сыалларын ситиспиттэриттэн үөрдүм. Кыайбыттарыгар ойон тура сыстым, сорох түгэннэргэ олус кыһыйдым, ытаатым. Хаартыскаларга, видеоларга көрбүппүнэн уонна кинигэҕэ аахпыппынан тэҥнээтэххэ, артыыстар наһаа үчүгэйдик талыллыбыттар, үүтүкчүлэр. Иннокентий Луковцев Дмитрий Коркин кэргэнигэр, оҕотугар, уолаттарыгар сыһыанын киһини долгутар гына тиэртэ. Улуу тренер кырдьык да, чулуу киһи буоларын өссө төгүл дакаастаатылар. Кини уолаттарын өтө көрөн, атын дойдуга бэйэлэрин туттуна, көрүнэ сылдьалларыгар эрдэттэн бэлэмниир эбит. Хас биирдии уһуйааччы, тренер көрүүтэ киэн буолуохтаах дии санаатым. Ону таһынан киинэҕэ тыа сирин үлэтин-хамнаһын, дьиэ ис-тас үлэтин кыайа тутан улааппыт оҕо тулуурдаах, дьаныардаах буоларын, маны сэргэ төрөппүт оҕотун инникитигэр өйөбүл буолуохтааҕын чаҕылхайдык көрдөрдүлэр. Бу – биһиэхэ, эдэр ыччакка, эдэр төрөппүттэргэ холобур буолар. Киинэни устубут хамаандаҕа, артыыстарга махтанабын.
«Триумф» уус-уран киинэ киэҥ араҥаҕа ситиһиилээхтик таҕыстын, үгүс дьон сүрэҕин кутун туттун, көрөөччүлэр кэнэҕэски кэнчээри ыччаккэ кэпсэл оҥоһуннуннар. Саха историятыгар кыһыл көмүс буукубаларынан суруллубут үс олимпиецпыт үйэлэр тухары ааттара ааттана турдун.
Марфа Петрова.