Бу кыһын, ахсынньыга, Прокопий Сокольников аатынан Чурапчытааҕы киин балыыһа уораҕайын иккис уочаратын үлэҕэ киллэрэр былааннаахтар. Бу туһунан СӨ Тутууга министиэристибэтэ иһитиннэрэр.
“Б” уонна хаһаайыстыбаннай блоктар “Доруобуйа” национальнай бырайыагынан тутуллаллар.
“Бу аныгы үйэ ирдэбилигэр толору эппиэттиир комплекска мэдиссиинэ көмөтө барыта оҥоһуллуоҕа. Барыта биир сиргэ түмүллэрэ дьоҥҥо-сэргэҕэ ордук табыгастаах буолуоҕа. Биһиги хаачыстыбаны үрдэтэр соруктаахпыт”, — диэн бэлиэтиир СӨ Ил Дархана Айсен Николаев.
Балыыһа комплексыгар симиэнэҕэ 100 киһи көрдөрөр кыахтаныа, терапевт отделениета 23 куойкаланыа, терапияҕа күнүскү стационар (10 куойка), тиис эмтиир отделение уо.д.а. баар буолуохтара.
Итини таһынан, хаһаайыстыбаннай блокка МРТ уонна суһал көмөнү оҥорор отделение, гараж, ыскылаат былааннаналлар. Саҥа тутуу билигин үлэлии турар 2003 сыллаахха тутуллубут балыыһаны кытары сылаас көрүдүөрүнэн холбонуо.
«Б» блокка лифт, ититии, уот-күөс ситимнэрэ, дьиэ эркиннэрэ оҥоһуллаллар, иккис уонна үһүс мэндиэмэннэргэ керамогранит билиитэттэн муостаны оҥороллор. Түөрт мэндиэмэннээх «Б» блок иэнэ 3,3 тыһ кв миэтэрэ кэриҥэ. Маны сэргэ, тротуардары оҥороллор. Үүнээйи олордуута эмиэ ыытыллар. Эбийиэккэ 65 киһи үлэлиир. Билиҥҥи туругунан тутуу 79% бэлэм.
Санатан эттэххэ “Доруобуйа” национальнай бырайыак сүрүн сыала-соруга — мэдиссиинэ көмөтүн олорор сирдэрин таһыгар оҥоруу, нэһилиэнньэҕэ барытыгар мэдиссиинэ көмөтө тоҕоостоох, кыаллымтыа буоларын үрдэтии буолар. РФ Бэрэсидьиэнэ Владимир Путин көҕүлээбит бырайыактара 2019 сылтан саҕаламмыттара. Бу сыллар усталарыгар Саха сиригэр перинатальнай уонна сүрэх-тымыр ыарыыларын эмтиир кииннэр, оройуоннааҕы икки киин балыыһа, 65 амбулатория уонна биэлсэр-акушер пууннара үлэҕэ киирбиттэрэ. 229 тырааныспар, ол иһигэр 16 мобильнай көһө сылдьар комплекс, мэдиссиинэ 663 тэрилин атыыласпыттара.
Саха сирэ.
Бэлэмнээтэ Сэмэн Жендринскэй.