Кырдьаҕастар аан дойдутааҕы күннэрин чэрчитинэн, Чурапчы нэһилиэгин “Центральнай” ТОС салалтата (Таныкова Т.Н.), бэтэрээннэрин сэбиэтэ (бэрэссэдээтэл Егорова Л.Н) көҕүлээһиннэринэн, алтынньы 8 күнүгэр, ыччат киинигэр аҕам саастаах дьоммутугар аналлаах дьоро күн буолла. Сааһырыыны көмүс күһүнү кытта тэҥнииллэр. Кырдьык, бу кэм киһи олоҕун муударай кэрдиис кэмэ, саҥа саҕахтары арыйар дьоһуннаах сааһа. Үгүс дьон сынньалаҥҥа тахсан баран бэйэлэрин сөбүлүүр дьарыктарынан үлүһүйэн дьарыктаналлар, араас бэйэлэр сөптөөх куруһуоктарга сылдьаллар.
Бу күн ыччат киинин ыраас сырдык саалатыгар элбэх киһи муһунна. Урукку сылларга бу дьиэ киин бибилэтиэкэ эрдэҕинэ, “Центральнай” ТОС манна элбэх тэрээһиннэри ыытара. Фойеҕа ТОС талба талааннахтарын: Валентина Посельская, Надежда Говорова уус – уран кэрэ оҥоһуктарын, Марфа Дьячковская, Анастасия Аргунова, Мария Кондратьева, Мария Дьячковская историяны кэрэһэлиир баай ис хоһоонноох кэллиэксийэлэрин, кинигэлэрин быыстапката турбутун дьон сэргээн, сэҥээрэн көрдө.
Дьаһал үөрүүлээх чааһыгар Чурапчы нэһилиэгин баһылыгын социальнай боппуруостарга солбуйааччы Варвара Макарова эҕэрдэтин тиэртэ уонна үлэ бэтэрээнигэр, сэрии сылларын оҕотугар Валентина Семеновна Посельскаяҕа Чурапчы нэһилиэгин Улуу Кыайыы 80 сылынан үбүлүөйдээх мэтээлин туттарда. Оттон нэһилиэк дьокутааттарын сэбиэтин бэрэссэдээтэлэ, “Центральнай” ТОСтан дьокутаат Василий Гуляев олус истиҥ ахтыыны оҥордо уонна олохтоохтор накаастарын толорууга туох үлэ барарын сырдатта. ТОС бэтэрээннэрин сэбиэтин бэрэссэдээтэлэ Людмила Егорова,Чурапчы улууһун оҕо аймах уонна дьиэ кэргэн дьыалаларын исписэлииһэ Татьяна Бушкова эҕэрдэ суруктарын Наталья Гуляеваҕа, Зинаида Захароваҕа, Клавдия Прокопьеваҕа туттарда. ТОС бэрэссэдээтэлэ Туйаара Таныкова үбүлүөйдээх саастаах дьоммутугар эҕэрдэ суруктары уонна сэмэй бэлэхтэри туттартаата. Үөрүүлээх чааһы алгыс үҥкүүтүнэн Мария Баягантаева, хомус дьүрүскэн тыаһынан Ирина Петрова, ылбаҕай ырыаларынан Ева Попова, Наталья Захарова киэргэттилэр.
Ити кэнниттэн минньигэс астаах, сылаас чэйдээх остуол тула олорон ирэ-хоро кэпсэттилэр, ырыа-тойук дьиэрэйдэ, көрдөөх оонньууга көхтөөхтүк кыттан бириис тутан үөрдүлэр. Сынньалаҥ кэмигэр Людмила Васильева музыка тыаһыгар уйдаран доруобуйаҕа туһалаах хамсаныылары оҥоттордо. “Бырахтыҥ, таптыҥ — илии тутуурдаах, өттүк харалаах дьиэлиигин!” оонньуу улахан сэргэхсийиини ылла. Манна теннис мээчигинэн көҕөнү табан, дьоллоох дьон дьиэлэригэр кустаах бардылар. Кустары урбаанньыт Эдуард Таныков уонна кииннэммит бухгалтерия программиһа Иван Алексеев аҕам саастаах дьоммутугар анаан туруордулар. Кинилэргэ махталбытын тиэрдэбит.
Дьоро күнтэн, сэргэх тэрээһинтэн дьон сүргэлэрэ көтөҕүллэн тарҕастылар. Махталбытын тиэрдэбит ыччат киинин кэлэктиибигэр ( сал. А.Н. Федорова) , өссө да бииргэ үлэлииргэ баҕа санаабытын тиэрдэбит.
Наталья Захарова.