Арассыыйаҕа норуоттар Сомоҕолоһууларын күнүнэн Чурапчы улууһугар уопсастыбаннас үөрүүлээх мунньаҕа буолла.
Дьаһал РФ уонна Саха сирин Өрөгөй ырыаларынан саҕаланна.
Сүрүн дакылааты улуус баһылыга Степан Саргыдаев оҥордо. Норуоттарын туһугар үлэлээбит, дойдуларын сайдыытыгар сүҥкэн кылааттарын киллэрбит улуу тириэньэр Дмитрий Коркин, Саха АССР норуодунай комиссардарын сэбиэтин бэрэссэдэтээлэ Иван Винокуров, норуодунай суруйааччы Василий Яковлев – Далан уонна да атын Чурапчы устуоруйатыгар үйэлэргэ хаалбыт чулуу дьоммут үбүлүөйдээх сыллара улууска киэҥ далааһыннаахтык бэлиэтэммиттэр. Бу күннэргэ бөдөҥ политическай диэйэтэл, СӨ норуотун хаһаайыстыбатын үтүөлээх үлэһитэ, «Үлэ кыһыл знамята” уордьан кавалера, Чурапчы улууһун бочуоттаах олохтооҕо Илья Листиков төрөөбүтэ 95 сылыгар аналлаах тэрээһиннэр ыытыллаллар. Чурапчытааҕы райкуомун бастакы сэкирэтээрэ Илья Павлович былааннаах үлэ ыытан, 1977 сылтан Нерюнгри куорат уонна Чурапчы улууһун икки ардыларыгар доҕордоһуу сыһыан олохтоммут. Күн бүгүн бу сыһыан бөҕөргөөн, кэҥээн, ситимнээх үлэлэр ыытыллалларын улуус баһылыга сырдатта.
Тус этиитин түмүк тылыгар: «Саха дьонун аар-саарга ааттаппыт, араас омуктары кытта доҕордоһуу сыһыаны өрө тутан, нус-хас олоҕу хааччыйбыт, төрөөбүт улууспут сайдарын туһугар элбэх үлэни ыыппыт тумус туттар туруу үлэһит дьоммутунан киэн туттабыт, кинилэргэ махтанабыт», — диэн бэлиэтээтэ.
Үөрүүлээх күнүнэн улуус баһылыга Степан Саргыдаев уонна улуус дьокутааттарын сэбиэтин бэрэссэдээтэлэ Яков Оконешников өрөспүүбүлүкэ салалтатын наҕараадаларын туттардылар: «Гражданскай килбиэн» үрдүк бэлиэни улуустааҕы киин бухгалтерия хаһаайыстыбаннай чааһын сэбиэдиссэйэ Людмила Егороваҕа, «СӨ Муниципальнай сулууспа бэтэрээнэ» бэлиэни Арыылаах нэһилиэгин дьаһалтатын кылаабынай исписэлииһэ Екатерина Платоноваҕа, «Гражданскай оборона 90 сыла» мэтээли улуус биир кэлим диспетчерскай сулууспа начаалынньыга Иван Хоютановка. Маны сэргэ Илья Листиков үбүлүөйдээх сылынан кини дьиэ кэргэнигэр анаан улуус эҕэрдэ суругун эһэтин аатынан сиэнигэр Илья Листиковка туттардылар.
Нэһилиэк баһылыга Владимир Сивцев эҕэрдэлээн туран, «Чурапчы нэһилиэгэ төрүттэммитэ 375 сыла» үбүлүөйдээх түөскэ иилиллэр бэлиэни үлэ уонна СӨ ОДьКХ бэтэрээнэ Михаил Новгородовка, СӨ Тыа хаһаайыстыбатын үтүөлээх үлэһитэ Василий Поповка туттарда.
Салгыы ыҥырыылаах ыалдьыт Илья Листиков, өрөспүүбүлүкэтээҕи Ытык сүбэ чилиэнэ, убаастыыр салайааччыбыт Иннокентий Аммосов уонна ыччаттар ааттарыттан гимназия дириэктэрэ Юрий Слепцов эҕэрдэ тыл эттилэр.
Быйыл улуус дьаһалтата Илья Павлович Листиков 95 сылынан улуус сайдыытыгар кылааттарын киллэрэ сылдьар, үлэ араас эйгэтигэр таһаарыылаахтык үлэлиир эдэр салайааччыларга биир кэмнээх бириэмийэни олохтоото. Ол курдук, «Бастыҥ эдэр салайааччы» бириэмийэни ыллылар: Чурапчы улууһун социальнай харалтаҕа салалтатын нэһилиэнньэҕэ көмөнү оҥорор отдел салайааччыта Ольга Баишева, улуустааҕы киин балыыһа инфекционнай салаатын отделениетын салайааччыта Надежда Дьячковская, Болтоҥо орто оскуолатын дириэктэрэ Владислав Скрябин, улуустааҕы успуорт салалтатын начаалынньыгын солбуйааччы Альберт Собакин уонна Мырыла нэһилиэгиттэн бааһынай хаһаайыстыба салайааччыта Егор Ефремов.
Сомоҕолоһуу күнүнэн улуус талба талааннаахтара, үҥкүүһүттэрэ араас дойду норуоттарын үҥкүүлэрин толорон, «Айылгыга» саалыгар мустубут дьону-сэргэни сэргэхситтилэр.
Дьаһал кыттыылаахтара Анатолий Захаров таһаарыытыгар Доҕордоһуу ырыатын тэҥҥэ дьиэрэтэн ыллаһан, үөрүүлээх мунньаҕы биир долгуҥҥа уйдаран түмүктээтилэр.
Марфа Петрова.
