Чурапчы улууһун дьаһалтатын көҕүлээһининэн “Уһун үйэлэнии” национальнай бырайыак олус таһаарыылаахтык үлэлиир. Ол курдук, быйыл улуус бэтэрээннэрин Сэбиэтин бэрэстээтэлэ Матрена Матвеева быһаччы салалтатынан анал граны ылары ситистилэр, итиннэ улуус дьаһалтата утары баран, эбии үбүлээһинин түмүгэр бүгүн, Чурапчы нэһилиэгэр Дьиэ кэргэҥҥэ элбэх өҥөнү оҥорор киин иһинэн “Силис” аҕам саастаах дьоҥҥо күнүскү лааҕыр үөрүүлээх арыллыыта буолла.
Манна даҕатан эттэххэ, өссө 2023 сыллаахха Чурапчы улууһугар аан бастакытын, өрөспүүбүлүкэтээҕи, 65 саастарын ааспыт дьоҥҥо чэбдигирдии, сынньалаҥ лааҕыра, Чурапчытааҕы физкултуура уонна успуорт үнүстүүтүн баазатыгар тэриллибитэ.
“Быйылгы сыллаахха бастакы тэрээһиммит буолла, манна 55 саастарыттан үөһэ саастаах 10 киһи хабылынна. Күнүнэн сылдьыахтара, эрдэттэн биллэрии ыытаммыт, баҕалаахтары талан ыллыбыт. Үгүстэрэ дьиэлэригэр-уоттарыгар соҕотоҕун олорор дьоннор. Күҥҥэ иккитэ аһыыллар, дьиэлэриттэн 9 чааска барыларын хомуйабыт, 10 чаастан доруобуйаларын чэбдигирдэр гимнастика, хаалыктаах хаамыы буолар. Ити кэнниттэн эбиэттииллэр, сытан сынньаныахтарын сөп, иккис этээскэ кинилэргэ усулуобуйа оҥоһулунна. Быйыл бу манан бүтэр эбит буоллахпытына эһиилги сылга эмиэ граҥҥа үлэлэһиэхпит уонна улууспут эмиэ харчы көрдөҕүнэ сайыҥҥы өттүгэр ыытыахпытын баҕарабыт. Дьиҥинэн, үнүстүүт ректора Иннокентий Готовцевы кытары хас да сыллааҕыта, кини Мырылатааҕы баазаларыгар кииннэнэр курдук кэпсэтии буолбута. Ол онтубут бу үппүт-аспыт хойутаан кэлэн итиэннэ үлэһиттэр үгүстэрэ уоппускаҕа сылдьар буоланнар кыаллыбата,” – диэн улуус бэтэрээннэрин Сэбиэтин бэрэстээтэлэ Матрена Матвеева кэпсээтэ.
Уһуннук олоруу холобурун бэйэбит ортобутугар көрсүөтүк, сэмэйдик олорор дьонтон буларбыт ордук үчүгэй, улахан туһалаах. Уһуннук олорор дьон биһиэхэ билигин да элбэхтэр.
Тэрээһин үөрүүлээх чааһыгар “Чурапчы улууһа” МО баһылыгын социальнай боппуруостарга солбуйааччы Мария Кронникова, дьиэ кэргэҥҥэ элбэх өҥөнү оҥорор киин дириэктэрэ Мария Саввина, Чурапчы улууһун социальнай харалтаҕа управлениетын салайааччыта Лидия Тосукаева эҕэрдэ тыллары эттилэр, бука бары лааҕыр үлэтэ таһаарыылаах буоларын, салгыы бу хамсааһын тиһигин быспакка үлэлииригэр баҕа санааларын эттилэр.
Надежда Егоровна Саввина, лааҕыр саамай аҕам 81 саастаах кыттааччыта, сааһын тухары ыанньыксыт: “Төрдүм Хаҥалас. Одьулуун нэһилиэгэр төрөппүт кыыһым, Чурапчыга уолам аах бааллар. Билигин сиэммэр күүлэйдии кэлэ сылдьабын. Бу лааҕырга кыыһым суруттарбыта, хоту Алдаҥҥа күүлэйдээн кэлэн бараммын аны үргүлдьү манна аастым. Олус үчүгэй тэрээһин эбит, бу иннинэ үс сыллааҕыта “Чэбдиккэ” сылдьыбытым, онно сэрээккэ эҥин диэн суоҕа, көннөрү сынньалаҥ эрэ этэ. Бэйэм урут-уруккуттан кыра мэникпин, оҕо былаһааккатыгар турар хачыалларга эҥин тахсаммын оонньуубун. “Бу эбээбит тахса-тахса, биһигиннээҕэр ордук сэрээккэлиир,” – диэн сиэннэрим билиҥҥээҥи диэри күлэлллэр”.
Маргарита Петровна Лукина, лааҕыр саамай эдэр 56 саастаах кыттааччыта, төрүт Чурапчы, эрдэ буҕаалтырынан үлэлээбит: “Биэнсийэҕэ тахсыахпыттан 4 кыһын Сочига кыстаатым. Лааҕыр диэннэригэр 5 кылаас кэннэ “Дабаан” лааҕырга сылдьыбыттааҕым уонна олохпор бу иккис лааҕырбар кэллим. Атын кыттааччыларбыт олус сэргэх дьоннор эбит, олус интэриэһинэй, элбэҕи билэ, көрө-истэ кэллибит. Бэйэм кыралаан иистэнэрбин сөбүлүүбүн”.
Лааҕыр арыллыбыт бэлиэтинэн аалай кыһыл лиэнтэни быстылар, успуонсардар бэлэмнээбит минньигэс туортарынан күндүлээтилэр. Бүгүн сарсыарда 10 чаастан бастакы дьарыктара буолла.
Манна кинилэри кытары педагогическай наука доктора, СӨ физическай култуураҕа уонна успуорка туйгуна Светлана Гуляева көрсөн бэсиэдэ ыытта, чэгиэн-чэбдик буолууга кэккэ сүбэлэри биэрдэ. Сарсын, бары тутуспутунан кэрэ айылҕалаах Мындаҕаайы сиригэр-уотугар айанныахтара.
Маннык хамсааһын чахчы наһаа наадалаах, ордук бочуоттаах сынньалаҥҥа тахсыбыт, ханна даҕаны бараркэлэр кыаҕа суох аҕам саастаах дьоҥҥо. Инникитин даҕаны улуус дьаһалтатын өйөбүлүнэн лааҕыр хастыы эмэ сезоннаах буоларыгар баҕарыллар.
Сэмэн ЖЕНДРИНСКЭЙ. Ааптар хаартыскаҕа түһэриитэ