Бүгүн Бөтүгүттэ алааһыгар улууспут тыа хаһаайыстыбатынан дьарыктанааччылара Сайылык күнүн үөрүүлээх быһыыга-майгыга бэлиэтээтилэр.
Сарсыардаттан нэһилиэктэртэн кэлэн, «Үйэлээх килбиэн» сылыгар анаан түһүлгэ киэргэтиитигэр оҥоһуннулар. «Супер фермер» диэн күрэхтэһиигэ кытыннылар.
Ыһыах үөрүүлээх чааһыгар улуус баһылыга Степан Саргыдаев, улуус дьокутааттарын Сэбиэтин бэрэссэдээтэлэ Яков Оконешников, тыа хаһаайыстыбатын салалтатын начаалынньыга Анжелика Неустроева эҕэрдэ тылы эттилэр, наҕараадалары туттардылар.
Людмила Романова: «2015 сыллаахха бэйэм 4 ынаҕы ылан сүөһү иитэн саҕалаабытым. 2016 сыллаахха 1,5 мөлүйүөннээх граны ылан, Хатылыга бырагыраамаҕа киирэн, нэһилиэктэн 2,5 км тэйиччи сиргэ хотон туттан, бүгүҥҥэ диэри үлэлии сылдьабын. Билигин сүөһүм төбөтүнэн 47, онтон ыанар ынаҕа 18, 13 төрөөн турар. Күҥҥэ ортотунан 2-лии т ыыбын.
Оттуурбар улуус көмөтүнэн пресс-подборщик ылбытым, онон дьонум оттоон биэрэллэр. Сайынын оҕолорум кэлэн, көмө-тирэх буолаллар. Кыра оҕобун кытта сайылыкпытыгар олоробут, сүөһүбүтүн көрөбүт. Билиҥҥи үйэҕэ бэйэ хаһаайыстыбалаах буолан, сибиэһэй этинэн-аһынан, үүтүнэн аһыы олорорбут олус үчүгэй. Оҕолорум үлэҕэ үөрэнэллэр. Саамай сүрүнэ үлэнэн иитии буоллаҕа. Сайыммыт өлгөм үүнүүлээх буоларыгар бары да баҕарабыт. Бэйэм чааһынайбар сирим суох буолан арендаҕа ылан оттуубут.
Хаһаайыстыбалаах биир дойдулаахтарбын барыгытын Сайылык күнүнэн эҕэрдэлиибин, мантан сайын алтынньыга диэри күүстээх үлэбит саҕаланар, онон барыгытыгар ситиһиилэри баҕарабын», — диэн санаатын үллэстэр.
Елена Макаринская