Үгэскэ кубулуйбут кэмпириэнсийэ Иван Михайлович Павлов аатынан Чурапчы орто оскуолатыгар быйыл 9-с төгүлүн ыытыллар. Кэмпириэнсийэҕэ барыта 14 улуустан 100-тэн тахса кыттааччы кэллэ. Кинилэр 5 хайысханан кыттыахтара.
Кэмпириэнсийэ үөрүүлээх аһыллыытыгар оскуола дириэктэрэ Николай Попов, улуус баһылыга Степан Саргыдаев, үөрэх салалтатын начаалынньыга Юрий Посельскай, о.д.а эҕэрдэ тылы эттилэр.
Оскуола үөрэнээччилэрин толорууларыгар «Сайда тур, тапталлаах оскуолам!» хор, Оһуор үҥкүүтэ, барабанщиктар тэрээһини киэргэттилэр.
И.М. Павлов аатынан оскуола оҕону байыаннай-патриотическай иитиигэ ылсан үлэлиир биир бастыҥ оскуоланан буолар. Иван Михайлович тэлбит суолунан кини үлэтин салҕаан, элбэх ситиһиилээх үлэни-хамнаһы ыыталлар. «Память» байыаннай-патриотическай кулууп өрөспүүбүлүкэ чөмпүйүөннэрэ буолаллар, оскуола үөрэнээччилэрэ Д.М. Карбышев дьаһалларыгар сыллата кытталлар, бу күннэргэ эмиэ Москванан, Волгоградынан бараары бэлэмнэнэллэр.
Саха сириттэн дойдуларын көмүскээбит, олохторун толук уурбут буойуттар сырдык өйдөбүллэрин үйэтитиигэ сүдү кылаатын киллэрбит, Аҕа дойду Улуу сэриитин бэтэрээнэ Иван Михайлович Павлов эһиил төрөөбүтэ 105 сылын туолар.
Иван Михайлович Павлов — Саха АССР үтүөлээх учуутала, Албан аат үһүс истиэпэннээх, Аҕа дойду улуу сэриитин бастакы истиэпэннээх, «Хотугу сулус» уордьаннарын кавалера, СӨ Платон Алексеевич Ойуунускай аатынан государственнай бириэмийэ лауреата, Чурапчы оройуонун, Болугур уонна Чурапчы нэһилиэктэрин бочуоттаах гражданина, буойун, учуутал, үйэтитээччи.
Елена Макаринская