И.М.Павлов аатынан Чурапчытааҕы бойобуой Албан аат түмэлэ ахсынньыга урукку военкомат дьиэтигэр аһыллыаҕыттан күннэтэ үлэлиир, араас хабааннаах быыстапкалары тэрийэр, бэйэтин экспонаттарын хаҥатар. Ол курдук, быйыл Улуу Кыайыы 80 сылынан улууспут 17 нэһилиэгэ сэриигэ сылдьыбыт дьонун-сэргэтин, кыайыыны уһансыбыттары, сураҕа суох сүппүттэри, кыайыы иһин олохторун толук уурбут буойуттарын үйэтитэр сыалтан кинилэр туттубут малларынан, таҥастарынан-саптарынан, суруктарынан, докумуоннарынан быыстапкаларын туруораллара сыл бүтүөр диэри салҕанан барар.
Түмэл дириэктэрэ Владимир Дьячковскай: «Түмэлбитигэр Аҕа дойду сэриитигэр сыһыаннаах өйдөбүнньүктэри таһынан билигин буола турар анал байыаннай дьайыыга туһуламмыт экспонаттар эмиэ баалла. Бу саас улууспут баһылыга Степан Саргыдаев салайааччылаах бөлөх байыастарбытыгар анаан гуманитарнай көмө илдьибиттэрэ. Онно уолаттарбыт араас кинигэлэри, учуобунньуктары, малы-салы ыыппыттара. Хайдахтаах курдук устуоруйа чахчыларын токурутан, уларытан, үүнэр көлүөнэлэригэр өс санааны үөскэтэр пропаганда ыыталларын дьоммут-сэргэбит көрдүнэр-иһиттинэр диэн. Мары барытын биһиги түмэлбитигэр кэлэн көрүөххүтүн сөп»,-диэн билиһиннэрэр.
Бу муус устар ыйга «Үөрүү» оҕо дьоҕурун сайыннарар киин «Оружие Победы» диэн сэрии сэбиргэлин макеттарын оҥорууга улуус иһинэн куонкурус ыыппыта. Бастаан оскуолалар бэйэлэрин истэригэр, оттон билигин улуустааҕы этап быыстапка быһыытынан бу Бойобуой Албан аат түмэлигэр турар. Манна оҕолор араас матырыйаалтан улуу кыайыыны ситиһэргэ төһүү күүс буолбут бэстилиэттэртэн саҕалаан улахан танкаларга тиийэ үүт-үкчү макет оҥорбуттарын киһи сөҕө көрөр. Дьүүллүүр сүбэ түмүгү таһаардаҕына кыайыылаахтар дипломунан наҕараадаланыахтара, бастыҥ үлэлэр «Сүгүрүйэбит Улуу Кыайыыга» бэстибээл улахан быыстапкатыгар туруохтара.
Онон улууспут олохтоохторо бука бары Бойобуой Албан аат түмэлигэр тиийэн быыстапканы сэргиэххитин, көрүөххүтүн сөп.
Наталья Сибирякова, ааптар видеота