Тэрээһин үөрүүлээх аһыллыыта С.К. Макаров аатынан Чурапчытааҕы гимназияҕа буолла. Илин эҥэр улуустар баһылыктара, баһылык солбуйааччылара, дьокутааттар Сэбиэттэрин бэрэссэдээтэллэрэ, үөрэх салалтатын начаалынньыктара, дириэктэрдэр о.д.а. кыттыыны ыла кэллилэр.
СӨ Наука академиятын төрүт тылы үөрэтэр, харыстыыр уонна сайыннарар киин салайааччыта Феодосия Габышева, СӨ Үөрэх уонна наука министиэристибэтиттэн Александр Брызгалов, улуус баһылыга Степан Саргыдаев форум аһыллыбытынан эҕэрдэлээтилэр, ситиһиилээх үлэни баҕардылар.
«Форумҥа 7 улуустан 200-чэкэ киһи кытта кэллэ. Форум 6 былаһаакканан ыытыллыаҕа. Бу түмүгүнэн концепция ылынан, илин эҥэргэ үөрэх биир ситимэ тэриллиэҕэ.
Маннык хабааннаах форумнар Бүлүү уонна хоту улуустарга эмиэ ыытыллан кэллилэр. Көҕүлээччилэринэн Ил Дархаммыт Айсен Николаев, үөрэх миниистирэ Ньургууна Соколова уонна СӨ Наука академиятын төрүт тылы үөрэтэр, харыстыыр уонна сайыннарар киин салайааччыта Феодосия Габышева буолаллар.
Форумҥа илин эҥэргэ үөрэх хаачыстыбатын үрдэтии, аныгы усулуобуйаҕа оҕону сөпкө иитии, төрүт тылбытын харыстааһын, каадырынан хааччыллыыны уонна демография политикатын көрүү, чөл туругу олохтооһун уонна агроүөрэхтээһини сайыннарыы курдук хайысхаларга сыалланан-соруктанан үлэлиэхпит”, — диэн улуус баһылыга Степан Саргыдаев билиһиннэрэр.
Елена Макаринская