Бу күннэргэ улууспутугар Улуу Кыайыы 80 сылын көрсө араас хабааннаах тэрээһиннэр ыытыллаллар. Бүгүн «Айылгы» норуот айымньытын дьиэтигэр Мунхалов галереятыгар «Кыайыы суолунан» диэн аныгылыы солун быыстапка аһылынна.
Тэрээһин үөрүүлээх чааһыгар улууспут баһылыга Степан Саргыдаев, байыаннай параат солбуллубат ыытааччыта, майор Семен Никитин, И.М.Павлов аатынан бойобуой Албан аат түмэлин дириэктэрэ Владимир Дьячковскай, С.К.Макаров аатынан Чурапчытааҕы гимназия учуутала, байыаннай-патриотическай кулууп салайааччыта Сергей Абрамов эҕэрдэ тылларын эттилэр.
Манна мустубут оҕолор, ыалдьыттар быыстапканы олус сэргээн көрдүлэр. Борук-сорукка араас уотунан-күөһүнэн киэргэтиллибит быыстапка алдьархайдаах сэрии биллэриллибит бастакы күнүттэн саҕалаан Чурапчы көһөрүллүүтүн, ол ыар, сут-кураан кэмнэри барытын хабан өрөгөйдөөх кыайыыга тиэрдибит хорсун дьоммут олохторун-дьаһахтарын киһи дууһатын таарыйар култуура үлэһиттэрин куоластарынан кэпсээтилэр, муусуканан доҕуһуоллаатылар. Улууспут баһылыга Степан Анатольевич бэлиэтээн аһарбытын курдук: «Саамай сүрүнэ биһиги үүнэр ыччаттарбыт олорон ааспыт чулуу көлүөнэбит дьоруойдуу быһыытын, кинилэр хайдах курдук кыайыыны уһансыбыттарын, эйэлээх олох иһин охсуспуттарын билиэхтэрин наада». Онон улууспут олохтоохторо, эдэр дьон бу күннэргэ үлэлиир быыстапканы кэлэн көрүҥ, сэргээҥ.
Наталья Сибирякова, ааптар видеота